মৰাণ, 26 আগষ্ট: যি সময়ত চৰকাৰে দুৰ্নীতি নিৰ্মূলৰ বাবে কঠোৰ ব্যৱস্থা গ্ৰহণ কৰিছে তেনে সময়তে একাংশ ঠিকাদাৰে চলাই গৈছে লুন্ঠনৰাজ ৷ মুখ্যমন্ত্ৰীৰ কঠোৰ নিৰ্দেশনাকো যেন এক প্ৰকাৰে বৃদ্ধাংগুষ্ঠ দেখুৱাই একাংশ ঠিকাদাৰে চলাই গৈছে লুন্ঠনৰাজ । একাংশ ঠিকাদাৰৰ মইমতালিৰ বাবে বিভিন্ন সময়ত কুফল ভোগ কৰিবলগীয়া হয় সাধাৰণ জনতাই৷ শেহতীয়াকৈ, এনে এক ঘটনাই সংঘটিত হৈছে মৰাণত ৷ এটা জৰাজীৰ্ণ পথে জ্বলা-কলা খুৱাইছে ৰাইজক (Poor Condition of Road in Moran) ৷ বিধ্বস্ত ৰূপত পৰিণত মৰাণ সমষ্টিৰ অন্তৰ্গত খোৱাঙৰ শেনচোৱা পুখুৰী আৰু শিলপুতা সংযোগী পথটো ।
উল্লেখ্য যে, দুবছৰ পূৰ্বে পকীকৰণ কৰা হৈছিল পথচোৱা৷ কিন্তু দুবছৰ পিছতে পথটোৰ এচোৱাত এতিয়া একাঁঠু বোকা । কোটি টকা খৰচ বাবদ নিৰ্মাণ কৰা পথটোৰ দুৰাৱস্থাই ৰাইজক বাৰুকৈয়ে জলা-কলা খুৱাইছে । কেৱল ইমানেই নহয়, পথটোত থকা পকী দলংখনৰ এটা মুৰত পথটোৰ এটা অংশ প্ৰায় খহি পৰিছে । বিপদসংকুল ভাৱে পাৰাপাৰ হ'ব লগা হৈছে যান-বাহনসমূহ । যাৰ ফলত যিকোনো মুহূৰ্তত সংঘটিত হ’ব পাৰে দুৰ্ঘটনা ৷ স্থানীয় ৰাইজে জানিবলৈ দিয়া অনুসৰি, পথচোৱা মেৰামতি কৰাৰ সময়ত ৰাইজে ঠিকাদাৰক পথটো ভালদৰে মেৰামতি কৰিবলৈ কাতৰ অনুৰোধ কৰিছিল যদিও ৰাইজৰ অনুৰোধক কৰ্ণপাত নকৰিলে ঠিকাদাৰে ।
আনহাতে, মৰাণ সমষ্টিৰ বিধায়কজনৰ অতি ঘনিষ্ঠ বুলি পৰিচিত ঠিকাদাৰজনে কাকো কেৰেপ নকৰাৰ অভিযোগ উত্থাপন কৰিছে স্থানীয় ৰাইজে । উল্লেখ্য যে, স্কুল-কলেজৰ ছাত্ৰ-ছাত্ৰীৰ লগতে বহু যান-বাহন চলাচল কৰা পথটো জৰাজীৰ্ণ হৈ পৰাত চিন্তিত হৈ পৰিছে অঞ্চলবাসী । এই ক্ষেত্ৰত বিভাগীয় কৰ্তৃপক্ষ তথা স্থানীয় জনপ্ৰতিনিধিয়ে কিবা ব্যৱস্থা কৰিব নে? নে এনেকৈয় দুৰ্ভোগ ভুগীব লাগিব ৰাইজে । সেয়া হ’ব লক্ষণীয় ৷
লগতে পঢ়ক: ধেমাজিত উৎকোচ লৈ হাতে-লোটে ধৰা পৰিল পৰিবহণ বিভাগৰ কৰ্মচাৰী
