ডিব্ৰুগড়, 24 জুন : ডিব্ৰুগড়ত গুলীচালনাৰ ঘটনা সংঘটিত ৷ ঘটনাটোত আহত হৈছে ঠিকাদাৰ অৰুণ ৰায় আৰু কৰ্মচাৰী সুধীৰ ৰায় নামৰ দুগৰাকী ব্যক্তি ৷ দুলীয়াজানৰ অৰুণ ৰায়ৰ নিজ বাসগৃহত পুৱতি নিশালৈ চলিছিল সুধীৰ ৰায়ৰ জন্মদিনৰ পাৰ্টী ৷ সেই সময়তে ৰহস্যজনকভাৱে সংঘটিত হয় গুলীচালনাৰ ঘটনা ৷ আহত অৰুণ ৰায় আৰু সুধীৰ ৰায়ক প্ৰথম অৱস্থাত ডিব্ৰুগড়ৰ অসম চিকিৎসা মহাবিদ্যালয়ত ভৰ্তি কৰোৱা হৈছিল যদিও পৰৱৰ্তী সময়ত উন্নত চিকিৎসাৰ বাবে ডিব্ৰুগড়ৰ সঞ্জীৱনী নাৰ্চিংহোমত ভৰ্তি কৰা হয় । সম্প্ৰতি ডিব্ৰুগড়ৰ সঞ্জীৱনী নাৰ্চিংহোমত চিকিৎসাধীন হৈ থকাৰ লগতে জৰুৰী অস্ত্ৰোপচাৰ কৰি দুয়োজনৰ ভৰিৰ পৰা গুলী আৰু স্প্লীনতাৰ সদৃশ কিছু বস্তু উলিওৱা হৈছে বুলি জানিবলৈ দিছে চিকিৎসকে ।
ইফালে, অতিৰিক্ত আৰক্ষী অধীক্ষক ধ্ৰুৱ বৰাই পুৱাই সঞ্জীৱনী নাৰ্চিংহোমত উপস্থিত হৈ বুজ লয় সমগ্ৰ ঘটনাৰ । অৱশ্যে, ডেংগী ৰোগৰ বাবেহে অৰুণ চিকিৎসাধীন হ'ব লগা হৈছে বুলি জনাইছে পৰিয়ালৰ লোকে ৷ আৰক্ষী আৰু পৰিয়ালৰ ভূমিকাই এতিয়া অধিক ৰহস্যময় কৰি তুলিছে সমগ্ৰ ঘটনা ৷
