মৰাণ, 10 জুলাই: বিতৰ্কই লগ নেৰা হৈছে মৰাণ মহাবিদ্যালয়ৰ অধ্যক্ষা ড৹ মিতালী কোঁৱৰক ৷ শেহতীয়াকৈ অধ্যক্ষাগৰাকী মৰাণ মহাবিদ্যালয়ৰ ছাত্ৰ সমাজৰ প্ৰৱল প্ৰতিবাদৰ সন্মুখীন হোৱাৰ মাজতে শনিবাৰে অধ্যক্ষাগৰাকীৰ বিৰুদ্ধে অখিল ভাৰতীয় বিদ্যাৰ্থী পৰিষদ(ABVP)ৰ একাংশ সদ্যই দাখিল কৰিছে এজাহাৰ ৷ মৰাণহাট আৰক্ষী থানাত এজাহাৰ(FIR) দাখিল কৰি অধ্যক্ষাগৰাকীৰ বিৰুদ্ধে শীঘ্ৰে বিহিত ব্যৱস্থা গ্ৰহণ কৰিবলৈ প্ৰশাসন তথা অসম চৰকাৰলৈ ছাত্ৰ সংগঠনটোৰ সদস্যসকলে আহ্বান জনাইছে ৷
উল্লেখ্য যে, মৰাণ মহাবিদ্যালয়ৰ অধ্যক্ষা ড৹ মিতালী কোঁৱৰে নিজ গৃহত শিশু শ্ৰমিক হিচাপে ৰখা এটি 12 বছৰীয়া শিশুক অকথ্য নিৰ্যাতন চলোৱাৰ অভিযোগত যোৱা বৰ্ষৰ চেপ্তেম্বৰত স্বামীসহ গ্ৰেপ্তাৰ হৈ মৰাণ মহাবিদ্যালয়ৰ অধ্যক্ষা পদৰ পৰা নিলম্বন হৈছিল ৷ সেইগৰাকী বিতৰ্কিত অধ্যক্ষাই সোমবাৰে পুনৰ মহাবিদ্যালয়খনত যোগদান কৰিবলৈ অহাৰ পাচৰে পৰা মৰাণত সৃষ্টি হৈছে ব্যাপক প্ৰতিক্ৰিয়াৰ ৷
দুদিন পূৰ্বে মহাবিদ্যালয়ৰ প্ৰৱেশদ্বাৰত অধ্যক্ষাগৰাকীৰ প্ৰতিকৃতি দাহ কৰি প্ৰতিবাদ সাব্যস্ত কৰিছিল অখিল ভাৰতীয় বিদ্যাৰ্থী পৰিষদৰ একাংশ কৰ্মীয়ে ৷ লগতে শুকুৰবাৰে মহাবিদ্যালয় চৌহদৰ পৰা অধ্যক্ষাগৰাকীক পহুখেদা দিছিল একাংশ প্ৰতিবাদী ছাত্ৰই ৷ যোৱা মঙলবাৰে অখিল ভাৰতীয় বিদ্যাৰ্থী পৰিষদ মৰাণ সমিতিয়ে এক সংবাদ মেল আয়োজন কৰি বিতৰ্কিত ড৹ মিতালী কোঁৱৰৰ কাৰ্যকালত মৰাণ কলেজত ব্যাপক দুৰ্নীতি তথা অনিয়ম সংঘটিত হোৱাৰ অভিযোগ উত্থাপন কৰিছিল ৷
অধ্যক্ষাগৰাকীৰ বিৰুদ্ধে চৰাইদেউ জিলাৰ উপায়ুক্তক লিখিত অভিযোগ দাখিল কৰি লগতে বিতৰ্কিত অধ্যক্ষা ড৹ মিতালী কোঁৱৰে মহাবিদ্যালয় খনত সংঘটিত কৰা দুৰ্নীতিৰ উচিত তদন্ত বিচাৰি মৰাণহাট আৰক্ষী থানাত সংগঠনটোক সদস্যসকলে এখন এজাহাৰ দাখিল কৰে ৷ ধন আৰু ৰাজনৈতিক শক্তিৰ প্ৰভাৱ থকা বিতৰ্কিত অধ্যক্ষা ড৹ মিতালী কোঁৱৰৰ বিৰুদ্ধে আৰক্ষী আৰু শিক্ষা বিভাগে তদন্ত কৰিবলৈ সাহস কৰে নে নাই সেইয়া সময়ত হে পৰিলক্ষিত হ'ব?
লগতে পঢ়কঃ বিতৰ্কিত অধ্যক্ষা ড৹ মিতালী কোঁৱৰৰ পুনঃযোগদানক লৈ তীব্ৰ চাঞ্চল্য
