মৰাণ, 1 জানুৱাৰী: টিংখাঙত আৰম্ভ হৈছে দিহিংচাং food festival ২০২২(Dihingchang Food Festival 2022) ৷ যোৱা 31 ডিচেম্বৰ তথা শনিবাৰৰ পৰা দুদিনীয়া কাৰ্যসূচীৰে টিংখাঙত আয়োজন কৰা হৈছে "দিহিংচাং food festival ২০২২"। যাৰ ফলত টিংখাঙৰ বৰবাম, পানীবিল আৰু মাহমৰা আলিকিনাৰ মুগা চুমনি বিলত নৱবৰ্ষৰ প্ৰাকক্ষণত উখল-মাখল পৰিৱেশে বিৰাজ কৰিছে ৷ পৰ্যটকক আকৃষ্ট কৰিবৰ বাবে আকৰ্ষণীয়কৈ সজাই পৰাই তোলা হৈছে "দিহিংচাং বহুমুখী প্ৰকল্প"ৰ দুয়োটা পাৰ ৷ আজি এই খাদ্য মহোৎসৱৰ দ্বিতীয়টো দিন ৷
দুটা দিনৰ কাৰ্যসূচীত পৰ্যটকসকলৰ বাবে বিভিন্ন জনগোষ্ঠীয় পৰম্পৰাগত খাদ্য সম্ভাৰৰ লগতে মনোৰম প্ৰাকৃতিক পৰিৱেশত জলকেলি কৰাৰ আমেজ লাভ কৰিব ৷ শনিবাৰে আনুষ্ঠানিকভাৱে দুয়োটা প্ৰকল্প স্থলিত Food festival ৰ শুভাৰম্ভ কৰে টিংখাঙৰ বিধায়ক তথা মন্ত্ৰী বিমল বড়াই (Minister Bimal Bora inauguration Food Festival) ৷
উল্লেখযোগ্য যে, সমষ্টিটোৰ নিবনুৱা যুৱক-যুৱতী সকলৰ কৰ্ম-সংস্থাপনৰ উদ্দেশ্যে বিধায়ক বিমল বড়াই দুবছৰ পূৰ্বে গ্ৰহণ কৰা "দিহিংচাং বহুমুখী প্ৰকল্প" (Dihingchang Multipurpose Project) ই এতিয়া বহু নিৱনুৱাৰ মুখলৈ হাঁহি বিৰিঙাবলৈ সক্ষম হৈছে ৷ টিংখাঙৰ দুয়ো দিশত অৱস্থিত দিহিং আৰু দিচাং নদীৰ প্ৰাকৃতিক সম্ভাৱনাক সামৰি লোৱা দিহিংচাং প্ৰকল্প নামকৰণেৰে টিংখাঙৰ উদ্যমী যুৱক-যুৱতী সকলক আত্মসংস্থাপনৰ উদ্দেশ্যে মন্ত্ৰীগৰাকীয়ে নিজা উদ্যোগত গ্ৰহণ কৰিছিল এই অভিলাসী আঁচনি ৷
উক্ত আঁচনিৰ অন্তৰ্গত পানীবিল মৎস্য পালন কেন্দ্ৰত মীন পালনৰ যোগেদি প্ৰায় 200 জন শিক্ষিত নিবনুৱা যুৱকে কৰ্ম-সংস্থাপন লাভ কৰিছে ৷ প্ৰায় 250 বিঘা আয়তনৰ বিশাল জলৰাশিক 10 টা ভাগত বিভক্ত কৰি প্ৰতিটো ভাগত 20 জনকৈ নিবনুৱা যুৱকক মীন পালনৰ সুবিধা প্ৰদান কৰা হৈছে ৷ 2019 চনত আৰম্ভ কৰা এই মীন প্ৰকল্পৰ যোগেদি বাৰ্ষিক দুয়োটা মৎস্য পালন কেন্দ্ৰৰ মীন পালক সকলে এটা গোটত প্ৰায় 9 লাখ টকা উপাৰ্জন কৰিবলৈ সক্ষম হৈছে ৷
এই মীন কেন্দ্ৰটোত ৰৌ, বাহু, মিৰিকা, গ্ৰাচ কাৰ্প, গল্ডেন কাৰ্প, কমন কাপ আদিকে ধৰি বিভিন্ন প্ৰজাতিৰ মাছৰ পোনা মেলা হৈছে ৷ বৰ্তমানে এইসমূহ মাছ 1 কেজিৰ পৰা 7 কেজি পৰ্যন্ত ডাঙৰ হৈছে ৷ নিজৰ সপোনবোৰে এতিয়া সাৰ্থক ৰূপ লাভ কৰাত যথেষ্ট আনন্দ প্ৰকাশ কৰে মন্ত্ৰী বিমল বড়াই (Minister Bimal Bora) ৷ ভৱিষ্যতে দিহিংচাং প্ৰকল্পৰ যোগেদি মীন, কৃষি, বয়ন শিল্প আদিৰ দিশত ন-ন আঁচনি গ্ৰহণ কৰি বহু নিবনুৱা যুৱক- যুৱতীক কৰ্ম-সংস্থাপন দিয়াৰ পৰিকল্পনাৰ কথা উল্লেখ কৰে মন্ত্ৰীগৰাকীয়ে ৷
লগতে পঢ়ক: 2022 Last sunset view: ব্ৰহ্মপুত্ৰৰ পাৰত সূৰ্যাস্তৰ নান্দনিক দৃশ্য
