ডিব্ৰুগড়,25 জানুৱাৰী: ডিব্ৰুগড় চহৰৰ মাজ মজিয়াত সংঘটিত হৈছে ভয়ংকৰ অগ্নিকাণ্ড । অগ্নিকাণ্ড হোৱা স্থলীত উপস্থিত হ'ল কেইবাখনো অগ্নি নিৰ্বাপক বাহিনীৰ পানী ভৰ্তি বাহন । কিন্তু কেইবাখনো গাড়ীৰে পানী মাৰিও নিৰ্বাপন কৰিব নোৱাৰিলে জুই । অৱশেষত জে চি বিৰ সহায়ত মাটি-বালি দিহে স্থানীয় ৰাইজৰ সহযোগিতাত নুমুৱালে জুই । দুৰ্যোগ ব্যৱস্থাপনাৰ নামত কোটি কোটি টকা খৰচ কৰাৰ পাছতো কিন্তু নিৰ্বিকাৰ অগ্নি নিৰ্বাপক বিভাগ । তাৰ বিপৰীতে দেখা গ'ল মুখ্যমন্ত্ৰী গৃহ চহৰত জুই নুমুৱাৰ এনে নতুন কৌশলহে ।
ডিব্ৰুগড় চহৰৰ সন্তোষী-মা পথত শনিবাৰে সংঘটিত হয় এই ভয়ংকৰ অগ্নিকাণ্ড । স্থানীয়ৰ অভিযোগ যে পথ নিৰ্মাণৰ নামত বিসংগতিপূৰ্ণভাৱে পথৰ তলৰ গেছ পাইপ লাইন জে চি বিৰে পুৱা খান্দি হেলাৰঙে উন্মুক্ত গেছ প্ৰবাহিত পাইপ এৰি যোৱা হৈছিল । ইয়াৰ পৰাই সন্ধিয়া হয় অগ্নিকাণ্ডৰ সূত্ৰপাত । জনবসতি প্ৰধান অঞ্চলটোৰ পথৰ কাষত নলা খান্দোতে ফাটি যায় পাইপ গেছ । নিমিষতে ভয়াবহ ৰূপ ধাৰণ কৰে অগ্নিকাণ্ডই । নলাৰে পাইপেৰে প্ৰৱাহিত হৈ জুই বহু দূৰলৈ বিয়পি পৰে ৷ কোনো মতে ৰক্ষা বহু ব্যৱসায়িক প্ৰতিষ্ঠান আৰু বাসগৃহৰ । জুই নুমুৱাত বিফল অগ্নিনিৰ্বাপক বাহিনী । অৱশেষত সমীপতে থকা কেইবাখনো জেছিবিয়েহে নিৰ্বাপিত কৰে অগ্নি । ইয়াকে লৈ স্থানীয় ৰাইজৰ মাজত তীব্ৰ প্ৰতিক্ৰিয়া,ক্ষোভ আৰু আতংক । ডিব্ৰুগড় নগৰত পূৰ্বে অগ্নি কাণ্ডৰ ফলত শিশু সহ চাৰিজনকৈ লোকৰ কৰুণ মৃত্যুৰ পাছতো ডিব্ৰুগড়ৰত উন্নত নহ'ল অগ্নি নিৰ্বাপক বাহিনীৰ পদ্ধতি ।
লগতে পঢ়ক:চাৰি সপ্তাহৰ অন্তৰ্ৱৰ্তীকালীন জামিনত মুকলি ৰঞ্জন দৈমাৰী
