মৰাণ, ২৩ জুন : বিশ্বৰ মানচিত্ৰ অসম উজলি থকাৰ বহু কাৰণ আছে আৰু তাৰ ভিতৰত অন্যতম বুলি ক'লে সকলোৱে একে মুখে ক'ব অসমৰ চাহ খেতি । অসমৰ চাহ বিশ্বত প্ৰশংসাৰ পাত্ৰ । এই চাহ শিল্পক একান্ত বাবে নিৰৱচ্ছিন্নভাৱে ৰক্ষা কৰি আহিছে চাহ বাগিচাৰ(Tea garden) শ্ৰমিকৰ পৰা আৰম্ভ কৰি ক্ষুদ্ৰ কৰ্মচাৰীসকলে । কিন্তু সেই চাহ বাগিচাৰ শ্ৰমিক তথা কৰ্মচাৰীসকলে বছৰ বছৰ ধৰি সন্মুখীন হৈ আহিছে বিভিন্ন সমস্যাৰ ।
ইখনৰ পিছত সিখন চৰকাৰ আহিছে । কোনোবাখন চৰকাৰে তিনিবাৰ পৰ্যন্ত শাসনত আছে । শেহতীয়াকৈ বিজেপি চৰকাৰে একেৰাহে দ্বিতীয়বাৰৰ বাবে চৰকাৰ গঠন কৰিছে । কিন্তু চাহ শ্ৰমিক তথা চাহ বাগিচা অঞ্চলৰ সমস্যা সদায় একেই আছে ।
আনকি প্ৰতিখন চৰকাৰে চাহ শ্ৰমিকসকলৰ(tea worker) উন্নয়নৰ বাবে বিভিন্ন প্ৰতিশ্ৰুতি দি আহিছে লগতে বিভিন্ন ধৰণৰ উন্নয়নমূলক আঁচনিও ৰূপায়ণ কৰি আহিছে । কিন্তু প্ৰকৃতাৰ্থত সেই আঁচনি ঢুকি নাপাই সাধাৰণ চাহ শ্ৰমিকে । সেই আঁচনিসমূহৰ ভিতৰত অন্যতম আঁচনি হিচাপে বিবেচিত হৈ আহিছে আদৰ্শ বিদ্যালয় স্থাপন ।
বিগত চৰকাৰে চাহ বাগিচাসমূহত আদৰ্শ বিদ্যালয় (Model school) স্থাপনৰ বাবে এক আঁচনি গ্ৰহণ কৰিছিল । কিন্তু দেখা যায় যে এই বিদ্যালয়সমূহ পৰ্যাপ্ত নহয় । সেয়ে ডিব্ৰুগড় জিলা উপায়ুক্ত কাৰ্যালয়ৰ(Dibrugarh Dc office) সভাকক্ষত জিলা উপায়ুক্ত পল্লৱ গোপাল ঝাৰ সভাপতিত্বত চাহ বাগিচা প্ৰাথমিক শিক্ষক সংস্থাৰ লগত এখনি গুৰুত্বপূৰ্ণ বৈঠক অনুষ্ঠিত হয় । উক্ত সভাত প্ৰধানকৈ ছাত্ৰ-ছাত্ৰীসমূহৰ শৈক্ষিক দিশৰ উন্নতি তথা চাহ বাগিচাৰ অন্তৰ্গত বিদ্যালয়সমূহৰ উন্নতি সাধনৰ ওপৰত বিশদভাৱে আলোচনা কৰা হয় ।
যিহেতু চাহ বাগিচা অঞ্চলত থকা বহু বিদ্যালয়ৰ অৱস্থা অতি বেয়া লগতে ছাত্ৰৰ অনুপাতে শিক্ষকৰ সংখ্যা কম । সেয়ে বাগিচা অঞ্চলৰ শৈক্ষিক দিশৰ সামগ্ৰিক উন্নয়ন এই বৈঠকৰ মূল বিষয়বস্তু আছিল । সভাত অতিৰিক্ত শ্ৰম আয়ুক্ত, শ্ৰমিক পৰিদৰ্শকৰ লগতে জিলা শিক্ষা সমন্বয়কাৰীও উপস্থিত থাকে ।
লগতে পঢ়ক: চামগুৰিৰ পৰিস্থিতি পৰিদৰ্শন মন্ত্ৰী পীযুষ হাজৰিকাৰ
