নাহৰকটীয়া, 4 জুন : বৃহত্তৰ নামৰূপ আৰু নাহৰকটীয়া অঞ্চলত বৃদ্ধি পোৱা ক’ভিড ৰোগীৰ প্ৰতি লক্ষ্য ৰাখি বি ভি এফ চি হাস্পতালত প্ৰস্তুত কৰি উলিওৱা হৈছে এটি ক’ভিড কেয়াৰ কেন্দ্ৰ (Covid care center) ৷ যুটীয়া স্বাস্থ্য সঞ্চালকালয়, জিলা প্ৰশাসনৰ উদ্যোগত আৰু বি ভি এফ চি এলৰ সহযোগত সাজু কৰা এই কেন্দ্ৰটো ৷
কেন্দ্ৰটোত পুৰুষ আৰু মহিলাৰ বাবে ক্ৰমে 50 খন বিচনাৰ ব্যৱস্থা কৰা হৈছে ৷ ক’ভিড (Covid 19) ৰ লক্ষণ দেখা দিয়া আৰু ক’ভিড পজেটিভ পোৱা অঞ্চলটোৰ ৰোগী সকলক এই ক’ভিড কেয়াৰ কেন্দ্ৰই সকাহ প্ৰদান কৰিব বুলি ধাৰণা কৰা হৈছে ৷ সম্ভৱতঃ এই সপ্তাহতেই কেন্দ্ৰটো মুকলি কৰা হ’ব ৷
উল্লেখ্য যে, ৰাজ্যৰ ভিতৰত কৰ’ণা মহামাৰীৰ সংক্ৰমণ ক্ষেত্ৰত দ্বিতীয় স্থানত আছে ডিব্ৰুগড় জিলা ৷ ইতিমধ্যে জিলাখনত 3,927 গৰাকী লোক ক’ভিড 19ত আক্ৰান্ত হোৱাৰ বিপৰীতে 17 গৰাকী লোকে প্ৰাণ হেৰুৱাইছে ৷ বৰ্তমানলৈকে জিলাখনত 1501 গৰাকী ৰোগী সক্ৰিয় অৱস্থাত আছে আৰু 2049 গৰাকী ৰোগীয়ে আৰোগ্য লাভ কৰিছে ৷
