মৰাণ, 24 ডিচেম্বৰ: নাগৰিকত্ব সংশোধনী আইন(কা) ৰ বিৰোধিতাৰে বুধবাৰে সন্ধিয়া পুনৰ মুখ্যমন্ত্ৰী গৃহ চহৰ ডিব্ৰুগড় প্ৰতিবাদেৰে উত্তাল হৈ পৰে ৷ সদৌ অসম ছাত্ৰ সন্থাৰ উদ্যোগত আছুৰ শতাধিক কৰ্মীয়ে হাতে হাতে জোঁৰ লৈ এক প্ৰতিবাদী সমদল বাহিৰ কৰি নাগৰিকত্ব সংশোধনী আইন কোনো কাৰণতে মানি নোলোৱাৰ হুংকাৰ দিয়ে ৷
ডিব্ৰুগড়ৰ কানৈ মহাবিদ্যালয়ৰ পৰা বিশাল প্ৰতিবাদী সমদল বাহিৰ কৰি আছু কৰ্মী সকলে এই প্ৰতিবাদ চলাই নিব বুলি মন্তব্য কৰে ৷ কানৈ মহাবিদ্যলয়ৰ পৰা আৰম্ভ হোৱা এই প্ৰতিবাদ কে.চি. গগৈ পথ হৈ থানা চাৰিআলিত মিলিত হৈ 'কা' বিৰোধী শ্ল'গানেৰে ডিব্ৰুগড় চহৰৰ আকাশ বতাহ উত্তাল কৰি তোলে ৷
উল্লেখ্য ৰাজ্যত পুনৰ কা বাতিলৰ দাবীৰে বিভিন্ন দল সংগঠনৰ প্ৰতিবাদ সবল হৈ উঠাৰ লগে লগে ডিব্ৰুগড়তো বুধবাৰে আছু কৰ্মী সকলে 'কা' বিৰোধী প্ৰবল প্ৰতিবাদ গঢ়ি তোলে ৷ চৰকাৰে এই আইন বাতিলৰ বাবে কোনো ব্যৱস্থা হাতত ন'ললে পূৰ্বতকৈ অধিক জংগী আন্দোলন গঢ়ি তোলা হ'ব প্ৰতিবাদকাৰী সকলে হুংকাৰ দিয়ে ৷
