ডিব্ৰুগড়, 19 অক্টোবৰ : মাত্ৰ কিছুদিনৰ পূৰ্বে ফিলবাৰী কাণ্ডত ছাত্ৰ কৰ্মীৰ ভুলৰ বাবে ৰাজ্যজুৰি সমালোচিত হৈছিল সদৌ অসম ছাত্ৰ সন্থা (আছু ) ৷ কেৱল সেয়াই নহয় বিভিন্ন সময়ত বিভিন্ন ঘটনা পৰিঘটনাৰ বাবে সমালোচিত হৈ আছে আছু ৷ ইয়াৰোপৰি প্ৰায়েই চান্দা সংস্কৃতি কঢ়িয়াই নিয়াৰ অভিযোগ উত্থাপিত হৈ আহিছে সংগঠনটোৰ ওপৰত ৷ কিন্তু, আছুৰ সামাজিক দায়বদ্ধতাৰ কথা, অসমীয়া সমাজ জীৱনত থকা অৱদানৰ কথা কোনেও কাহানিও নুই কৰিব নোৱাৰে ৷
সেইয়ে হয়তো ৰাইজৰ হাজাৰ ওজৰ আপত্তিৰ পিছতো এতিয়াও অসমীয়া ৰাইজৰ সবাটোকৈ আদৰৰ সংগঠন সদৌ অসম ছাত্ৰ সন্থা ৷ সেই কথাই পুনৰবাৰ প্ৰমাণ কৰি দেখুৱালে সদৌ অসম ছাত্ৰ সন্থাৰ অন্তৰ্গত সদৌ ডিব্ৰুগড় জিলা ছাত্ৰ সন্থাই ৷ এইবাৰ দুখীয়া শ্ৰেণীৰ জনসাধাৰণ আৰু বিভিন্ন সময়ত দুৰ্ঘটনা গ্ৰস্ত ছাত্ৰ-ছাত্ৰীৰ সুবিধাৰ বাবে ডিব্ৰুগড়ত আছুৱে মুকলি কৰিলে এক এম্বুলেঞ্চ সেৱা ।
ডিব্ৰুগড় জিলা ছাত্ৰ সন্থাই বেংকৰ জৰিয়তে ঋণ লৈ ৰাইজৰ বাবে মুকলি কৰা এই এম্বুলেঞ্চ সেৱাৰ মুকলি কৰে সদৌ অসম ছাত্ৰ সন্থাৰ সাধাৰণ সম্পাদক শংকৰজ্যোতি বৰুৱাই ।
ডিব্ৰুগড় শ্বহীদ ন্যাসত এম্বুলেঞ্চ সেৱাৰ মুকলি অনুষ্ঠানত গায়ন-বায়নেৰে মাংগলিক কাৰ্যসূচীৰ জৰিয়তে এম্বুলেঞ্চ খন চলাই মুকলি কৰে আছুৰ সাধাৰণ সম্পাদক জনে । অনুষ্ঠানত অৰুণাচল বিশ্ববিদ্যালয়ৰ প্ৰাক্তন ডীন সৃষ্টিধৰ দত্ত, ৰাষ্ট্ৰপতি পুৰস্কাৰ প্ৰাপ্ত কৃতী শিক্ষক গন্ধেশ্বৰ শইকীয়া, বৃহত্তৰ প্ৰেছ ক্লাবৰ সভাপতি মনজিৎ বৰা সহ আছুৰ বিষয়ববীয়া সকল উপস্থিত থাকে ।
উল্লেখযোগ্য যে, ইতিমধ্যে ডিব্ৰুগড় আছুয়ে স্বৰ্গৰথ নামৰ এখন মৃতদেহ কঢ়িওৱা বাহন মুকলি কৰি ডিব্ৰুগড়ৰ লগতে উজনি অসমৰ তিনিচুকীয়া, শদিয়া, ধেমাজি-লক্ষীমপুৰলৈকে দৰিদ্ৰ লোক সকলৰ সেৱা আগবঢ়াই আহিছে । মঙলবাৰে এই এম্বুলেঞ্চ সেৱা উদ্বোধন কৰি ডিব্ৰুগড় জিলা ছাত্ৰ সন্থাৰ লগতে সদৌ অসম ছাত্ৰ সন্থাৰ বাবে এটা অতি গুৰুত্বপূৰ্ণ দিন বুলি কৈ এম্বুলেঞ্চখনৰ জৰিয়তে ছাত্ৰ-ছাত্ৰীৰ লগতে দৰিদ্ৰ শ্ৰেণীৰ লোকসকলৰ যথেষ্ট উপকৃত হব বুলি আশা ব্যক্ত কৰে শংকৰজ্যোতি বৰুৱাই ।
লগতে পঢ়ক : ভাওনাৰ মঞ্চত বিকৃত আচৰণক লৈ কি আহ্বান জনালে শংকৰজ্যোতি বৰুৱাই
