ডিব্ৰুগড়,14 অক্টোবৰঃ নামৰূপ তাপ বিদ্যুৎ কেন্দ্ৰৰ ৰিভাম্পেছন প্ৰকল্পৰ কাম এটা দশক অতিক্ৰম কৰি যোৱাৰ পাছতো সম্পন্ন হৈ নুঠাৰ প্ৰতিবাদত সদৌ অসম ছাত্ৰ সন্থাৰ নামৰূপ আঞ্চলিক সমিতিয়ে প্ৰকল্পটোৰ এনে অনিশ্চয়তাকলৈ সোমবাৰৰ পৰা আৰম্ভ কৰিছে এশঘন্টীয়া অনশনৰ কাৰ্যসূচী ৷ উল্লেখ্য যে কংগ্ৰেছৰ শাসনকালতেই ২০০৯ চনতেই নামৰূপ তাপ বিদ্যুৎ প্ৰকল্পৰ নৱীকৰণ প্ৰকল্পৰ নিৰ্মাণৰ কাম আৰম্ভ হৈছিল ৷ প্ৰকল্পটোৰ নিৰ্মাণৰ দায়িত্ব পোৱা ভেল নামৰ সংস্থাটোৱে আনকি নিৰ্ধাৰিত তিনিবছৰৰ আগতেই কেন্দ্ৰটোৰ পৰা বিদ্যুৎ উৎপাদন প্ৰক্ৰিয়া সম্ভৱ হৈ উঠিব বুলি সদৰীও কৰিছিল ৷ কিন্তু ২০১২ চনতো দূৰৰে কথা ২০১৯ চনতো প্ৰকল্পটোৰ পৰা বিদ্যুৎ উৎপাদন সম্ভৱ হৈ নুঠিল ৷ লক্ষ্যণীয় যে নামৰূপ থাৰ্মেল পাৱাৰ ষ্টেচনৰ বৰ্ড সভাই চলিত অক্টোবৰ মাহৰ ২ তাৰিখে প্ৰকল্পটোৰ শুভাৰম্ভ কৰা হ’ব বুলি আজি কেইবামাহ পূৰ্বে আনুষ্ঠানিকভাৱে সদৌ অসম ছাত্ৰ সন্থাক অৱগত কৰিছিল ৷ কিন্তু কাৰ্যতঃ উক্ত তাৰিখতো নতুন প্ৰকল্পটো আৰম্ভ কৰিব নোৱাৰাত কৰ্তৃপক্ষৰ প্ৰতি সন্দিহান হৈ পৰিছে ছাত্ৰ সংগঠনটো ৷ অনশন কাৰ্যত ভাগ লোৱা ছাত্ৰ সন্থাৰ প্ৰতিনিধিসকলে ৰিভাম্পেছন প্ৰকল্পৰ দায়িত্বত থকা বহিৰাগত কোম্পানী আৰু তাপবিদ্যুৎ কেন্দ্ৰটোৰ ঊৰ্দ্ধতন বিষয়া-বৰ্গৰ হেমাহিৰ বাবেই আজি দহবছৰেও প্ৰকল্পটো আৰম্ভ কৰিব পৰা নাই বুলি গুৰুতৰ অভিযোগ উত্থাপন কৰিছে ৷
আৰু পঢ়ক
