গৌৰীপুৰ, 11 ফেব্ৰুৱাৰীঃ আজি পুৱা ধুবুৰী জিলাৰ গৌৰীপুৰৰ বালাজানৰ বেলতোলাৰ ৰাষ্ট্ৰীয় ঘাইপথত সংঘটিত হয় এক ভয়াৱহ দুৰ্ঘটনা ৷ অভাৰ লোডিং পাইপ ভৰ্তি WB-63B-1120 নম্বৰৰ এখন বলে'ৰ পিক আপ ভেনৰ সৈতে WB-71A-8604 নম্বৰৰ বিবাহ যাত্ৰী ভৰ্তি আলট্ৰা বাছৰ মাজৰ মুখামুখি সংঘৰ্ষৰ ফলত সংঘটিত হয় এই দুৰ্ঘটনা ৷ জানিব পৰা মতে, পশ্চিম বংগৰ পৰা ফকিৰাগ্ৰাম লৈ আহিছিল বিবাহ যাত্ৰীসকল ৷ বিবাহ সম্পন্ন হোৱাৰ পিচত পুৱা পুনৰ পশ্চিম বংগ লৈ উভতি যোৱাৰ সময়ত দুৰ্ঘটনাত পতিত হয় বিবাহ যাত্ৰীৰ বাছখন ৷
বিবাহ যাত্ৰীয়ে উল্লেখ কৰা মতে, অতিৰিক্ত পাইপ ভৰ্তি পিক আপ ভেন খন এটা সময়ত নিয়ন্ত্ৰণ হেৰুৱাই বিবাহ যাত্ৰী ভৰ্তি বাছখনৰ ভিতৰলৈ সোমাই যায় ৷ ফলত বাছ খনত প্ৰায় ত্ৰিশ গৰাকী যাত্ৰীৰ ভিতৰত বিশ গৰাকী গুৰুতৰভাৱে আহত হোৱাৰ বিপৰীতে বিপুল ৰায় নামৰ কনডাক্টৰজন থিতাতে নিহত হয় ৷ আহত বিবাহ যাত্ৰী সকলক ধুবুৰীৰ অসামৰিক চিকিৎসালয়ত ভৰ্তি কৰোৱা হয় যদিও প্ৰীতম কৰ নামৰ এটি শিশু নিহত হয় ৷ ইতিমধ্যে চিকিৎসকে সাতজনকৈ আহত বিবাহ যাত্ৰীক সংকটজনক অৱস্থাত উন্নত চিকিৎসাৰ বাবে কোচবিহাৰলৈ প্ৰেৰণ কৰিছে ৷ উল্লেখ্য যে, পিক আপ ভেন খনৰ চালক আৰু হেণ্ডিমেন পলাতক অৱস্থাত থকা বুলি জানিব পৰা গৈছে ৷
লগতে পঢ়ক ঃ মাৰ্ঘেৰিটাত ভয়ংকৰ পথ দুৰ্ঘটনা
