ধুবুৰী, ৬ মাৰ্চ: ধুবুৰীৰ ফকিৰগঞ্জত আৰক্ষীয়ে অভিযান চলাই বিলাতী সুৰাসহ দুজন লোকক গ্ৰেপ্তাৰ কৰে । ফকিৰগঞ্জৰ মাটিফাটা অঞ্চলত হানীফ আলী নামৰ এজন লোকৰ বাসগৃহৰ পৰা আৰক্ষীয়ে বিলাতী সুৰাৰ ৬০টা বটল জব্দ কৰে । গোপন সূত্ৰৰ পৰা পোৱা খবৰৰ ভিত্তিতে আৰক্ষীয়ে অভিযান চলায় ।
অবৈধভাৱে সুৰাৰ ব্যৱসায় কৰাৰ অভিযোগত আৰক্ষীয়ে হানীফ আলীৰ লগতে পুত্ৰ ৰাছিদুল ইছলামক গ্ৰেপ্তাৰ কৰে । আৰক্ষীয়ে ধৃত পিতা-পুত্ৰক শনিবাৰে জিলা আবকাৰী বিভাগক গটাই দিয়ে ।
সুৰাৰ বিৰুদ্ধে ধুবুৰী জিলাৰ বিভিন্ন অঞ্চলত আৰক্ষীয়ে অভিযান চলাইছে যদিও ৰহস্যজনকভাৱে এই ক্ষেত্ৰত আবকাৰী বিভাগে নিৰৱতা অৱলম্বন কৰি আহিছে । অবৈধ সুৰা ব্যৱসায়ীৰ বিৰুদ্ধে অনাগত সময়তো আৰক্ষীয়ে অভিযান অব্যাহত ৰাখিব বুলি জানিবলৈ দিছে ।
লগতে পঢ়ক:বিধানসভা নিৰ্বাচনঃ এসপ্তাহত ৰাজ্যত জব্দ ৮৪.৪৩ লাখ নগদ ধন
