বিলাসীপাৰা, 3 নৱেম্বৰ: ধুবুৰী জিলাৰ বিলাসীপাৰাৰ যোগীৰমহল হাইস্কুলত বৃহৎ কেলেংকাৰী সংঘটিত হোৱাৰ ঘটনা পোহৰলৈ আহিছে ৷ পৰীক্ষাগাৰৰ নামত আৱণ্টিত 12 লাখ টকাৰ কেলেংকাৰী কৰি নিলম্বিত হোৱা ভাৰপ্ৰাপ্ত প্ৰধান শিক্ষয়িত্ৰী মমতাজ বেগমে আজিও কৰ্তৃত্ব খামুচি থকাৰ অভিযোগ তুলিছে বিদ্যালয় কৰ্তৃপক্ষই ৷ বিদ্যালয়খনত অটো ট্ৰেংকাৰীং লেব’ৰটেৰীৰ বিভিন্ন আঁচনিৰ লাখ টকা আত্মসাৎ কৰাৰ গুৰুতৰ অভিযোগত ইতিমধ্যে নিলম্বন কৰা হৈছে প্ৰাক্তন প্ৰধান শিক্ষক নুৰ ইছলাম আৰু ভাৰপ্ৰাপ্ত প্ৰধান শিক্ষয়িত্ৰী মমতাজ বেগমক ।
2016-2022 বৰ্ষ পৰ্যন্ত প্ৰায় 12 লাখ টকাৰ বিদ্যালয়খনৰ বয়-বস্তু বিক্ৰীৰ অভিযোগ প্ৰাক্তন প্ৰধান শিক্ষক নুৰ ইছলাম আৰু ভাৰপ্ৰাপ্ত প্ৰধান শিক্ষয়িত্ৰী মমতাজ বেগমৰ বিৰুদ্ধে । বিদ্যালয়খনৰ পৰিচালনা সমিতিৰ অভিযোগৰ ভিত্তিত বিদ্যালয়খনত শিক্ষা বিভাগে তদন্ত চলায় ভাৰপ্ৰাপ্ত প্ৰধান শিক্ষয়িত্ৰী মমতাজ বেগমক নিলম্বন কৰে । উল্লেখযোগ্য যে 2021 বৰ্ষৰ 31 ডিচেম্বৰৰ দিনা নুৰ ইছলামে চাকৰি জীৱনৰ পৰা অৱসৰ গ্ৰহণ কৰিছি আৰু 2021 বৰ্ষৰ 1 মাৰ্চত বিদ্যালয়খনৰ ভাৰপ্ৰাপ্ত প্ৰধান শিক্ষয়িত্ৰী হিচাপে নিযুক্তি লাভ কৰিছিল মমতাজ বেগমে ।
প্ৰাপ্ত অভিযোগ মতে চাকৰিকালত দুয়োজনে মিলি বিদ্যালয়খনৰ বিভিন্ন সা-সামগ্ৰী বিক্ৰী কৰি সমুদায় ধন আত্মসাৎ কৰিছিল । ফলত পৰৱৰ্তী সময়ত বিদ্যালয়খনৰ ভাৰপ্ৰাপ্ত প্ৰধান শিক্ষয়িত্ৰী মমতাজ বেগম নিলম্বিত হ'বলগীয়া হৈছিল । আশ্চৰ্যকৰ বিষয় যে, নিলম্বনৰ পিচতো মমতাজে শিক্ষা বিভাগৰ নিৰ্দেশনালৈ অংগ্ৃপষ্ঠ প্ৰদৰ্শন কৰি আজি পৰ্যন্ত এৰা নাই নিজৰ চকী ।
আনকি ধুবুৰী জিলা স্কুল পৰিদৰ্শকক মেনেজ কৰি স্কুলৰ বিক্ৰী হোৱা সামগ্ৰী বিদ্যালয়খনত পুনৰ মজুত কৰি নিজৰ চাকৰি বটোৱাৰো চেষ্ঠা চলোৱাৰো গুৰুতৰ অভিযোগ উত্থাপন হৈছে । সমান্তৰালভাৱে, লাখ টকাৰ সা-সামগ্ৰী বিক্ৰী কৰি নিলম্বিত হোৱা মমতাজে পৰৱৰ্তী সময়ত চৰকাৰী সা-সামগ্ৰীবোৰ ক'ৰ পৰা আৰু কেনেকৈ গ্ৰহণ কৰিলে সেই প্ৰশ্নৰো অৱতাৰণা হৈছে ৷
শিক্ষয়িত্ৰীগৰাকীৰ এনে কাৰ্যৰ বিৰুদ্ধে দুৰ্নীতিৰ বিৰুদ্ধে শূণ্য সহনশীল স্থিতি গ্ৰহণ কৰি অহা বুলি দাবী কৰি অহা চৰকাৰ তথা শিক্ষা বিভাগটোৱে কি ব্যৱস্থা গ্ৰহণ কৰে সেয়া হ’ব এক লক্ষণীয় বিষয় ৷
লগতে পঢ়ক: Congress slams BJP: পিয়াঁজেই সৰ্বনাশ মাতিছিল কংগ্ৰেছ দললৈ বুলি কিয় ক’লে বিৰোধী দলপতিয়ে ?
