বিলাসীপাৰা, ২২ জুন: আপুনি ভ্ৰাম্যমাণ থিয়েটাৰ,ভ্ৰাম্যমাণ চিকিৎসা সেৱাৰ কথা শুনিছে অথবা দেখিছে। কিন্তু বন মাফিয়াৰ ভ্ৰাম্যমান সেৱাৰ কথা হয়তো বহুতে নাজানে । ধুবুৰী জিলাৰ চাপৰত বন বিভাগৰ তৎপৰতাত পোহৰলৈ আহিছে বন মাফিয়াৰ চোৰাং কাঠৰ ভ্ৰাম্যমান সেৱাৰ কাহিনী।
বঙাইগাঁও আই উপত্যকা বন সংমণ্ডল,বঙাইগাঁও বন সুৰক্ষা বাহিনী আৰু বহলপুৰ আঞ্চলিক বন বিষয়াই এক গোপন সূত্ৰৰ ভিত্তিত চাপৰ ৰাজহ চক্ৰৰ কলোবাৰী PRF অঞ্চলত চলোৱা এক অভিযানত এটা অবৈধ ভ্ৰাম্যমাণ কাঠফলা মিলসহ বৃহৎ পৰিমাণৰ শাল কাঠৰ কুণ্ডা জব্দ কৰিবলৈ সক্ষম হয় । জব্দকৃত মিলটোৰ সৈতে কাঠখিনিৰ মূল্য প্ৰায় আঢ়ৈ লক্ষাধিক টকা হ'ব বুলি আঞ্চলিক বন বিষয়া নাৰায়ণ ঠাকুৰীয়াই জানিবলৈ দিছে
ইপিনে,এই জব্দকৃত কাঠফলা মিলৰ বিৰুদ্ধে তদন্ত আৰম্ভ কৰা হৈছে বুলিও বন বিষয়া নাৰায়ণ ঠাকুৰীয়াই জানিবলৈ দিয়ে।
