মাজুলী, 1 অক্টোবৰ: হাথৰস গণধৰ্ষণ কাণ্ড পোহৰলৈ অহাৰ পাচতে দেশজুৰি অব্যাহত আছে প্ৰতিবাদৰ ঢৌ ৷ বৃহস্পতিবাৰে কংগ্ৰেছ নেতা ৰাহুল গান্ধীয়ে পীড়িতাৰ পৰিয়ালক সাক্ষাৎ কৰিবলৈ যোৱাৰ সময়তে কংগ্ৰেছ নেতা গৰাকীক গ্ৰেপ্তাৰ কৰে উত্তৰ প্ৰদেশ আৰক্ষীয়ে ৷ অৱশ্যে পাচত আৰক্ষীয়ে মুকলি কৰি দিয়ে ৰাহুল গান্ধীক ৷
মাজুলী : ৰাহুল গান্ধীক গ্ৰেপ্তাৰৰ বিৰুদ্ধে ৰাষ্ট্ৰীয় কংগ্ৰেছৰ লগতে ৰাজ্যতো ঠায়ে ঠায়ে কংগ্ৰেছে প্ৰতিবাদ সাব্যস্ত কৰা পৰিলক্ষিত হয় ৷ উত্তৰ প্ৰদেশ আৰক্ষীয়ে ৰাহুল গান্ধীক গতিয়াই দিয়াৰ অভিযোগ তুলি মাজুলীত শতাধিক কংগ্ৰেছ কৰ্মীয়ে সাব্যস্ত কৰে প্রতিবাদ ৷ মুখ্যমন্ত্ৰী যোগী আদিত্যনাথৰ পুত্তলিকা দাহ কৰাৰ লগতে প্ৰতিবাদকাৰীসকলে বিজেপি চৰকাৰ বিৰোধী ধ্বনিৰে উত্তাল কৰি তোলে মাজুলীৰ ৰাজপথ ৷
ধুবুৰী: ৰাহুল গান্ধীক গ্ৰেপ্তাৰৰ বিৰুদ্ধে ধুবুৰী আৰু মানকাচৰতো প্ৰতিবাদ যুৱ কংগ্ৰেছৰ ৷ প্ৰধানমন্ত্ৰী নৰেন্দ্ৰ মোদীৰ পুত্তলিকা দাহ কৰাৰ লগতে পথ অৱৰোধ কৰি প্ৰতিবাদ সাব্যস্ত কৰে কংগ্ৰেছ কৰ্মীসকলে ৷
কলগাছিয়া: কংগ্ৰেছ নেতা ৰাহুল গান্ধীক কৰা অপমানৰ বিৰুদ্ধে কলগাছিয়াত প্ৰধানমন্ত্ৰী নৰেন্দ্ৰ মোদী আৰু উত্তৰ প্ৰদেশৰ মুখ্যমন্ত্ৰী যোগী আদিত্য নাথৰ পুত্তলিকা দাহ কৰে জনীয়া যুৱ কংগ্ৰেছে ৷ লগতে বিজেপি চৰকাৰক ধৰ্ষণকাৰী চৰকাৰৰ বুলি আখ্যা দিয়ে প্ৰতিবাদকাৰীসকলে ৷
কৰিমগঞ্জ: ইফালে কৰিমগঞ্জতো মুখ্যমন্ত্ৰী যোগী আদিত্যনাথৰ পুত্তলিকা দাহ কংগ্ৰেছৰ ৷ লগতে উত্তৰ প্ৰদেশৰ গণধৰ্ষণ কাণ্ডক তীব্ৰ গৰিহণা জনাই আৰক্ষীৰ বিৰুদ্ধে মুৰ্দাবাদ ধ্বনিৰে প্ৰতিবাদস্থলী উত্তাল কৰি তোলে প্ৰতিবাদকাৰীসকলে ৷
গোলাঘাট: গোলাঘাটতো যুৱ কংগ্ৰেছৰ তীব্ৰ প্ৰতিবাদ ৷ ৰাহুল গান্ধীক উত্তৰ প্ৰদেশ আৰক্ষীয়ে কৰা ব্যৱহাৰৰ বিৰুদ্ধে সোচ্চাৰ হৈ পৰে কংগ্ৰেছ । বিজেপি চৰকাৰ গ'বেক, নৰেন্দ্ৰ মোদী হায় হায়, উত্তৰ প্ৰদেশ চৰকাৰ মুৰ্দাবাদ আদি ধ্বনিৰে প্ৰতিবাদস্থলী উত্তাল কৰি তোলে যুৱ কংগ্ৰেছে।
নগাঁও: ৰাহুল গান্ধীক গ্ৰেপ্তাৰৰ বিৰুদ্ধে নগাঁৱতো NSUIৰ প্ৰতিবাদ ৷ প্ৰধানমন্ত্ৰী আৰু উত্তৰ প্ৰদেশৰ মুখ্যমন্ত্ৰীৰ পুত্তলিকা দাহ কৰাৰ লগতে চৰকাৰ বিৰোধী ধ্বনিৰে ৰাজপথ উত্তাল কৰি তোলে সংগঠনটোৰ সদস্য়সকলে ৷
বিলাসীপাৰা: বিলাসীপাৰাতো যুৱ কংগ্ৰেছৰ উত্তাল প্ৰতিবাদ ৷ ৰাহুল গান্ধীক গ্ৰেপ্তাৰৰ বিৰুদ্ধে বিলাসীপাৰাৰ গান্ধী চ’কত প্ৰধানমন্ত্ৰী আৰু উত্তৰ প্ৰদেশৰ মুখ্যমন্ত্ৰীৰ পুত্তলিকা দাহ কৰি বিলাসীপাৰা মূল ৰাজপথ উত্তাল কৰি তোলে যুৱ কংগ্ৰেছে ৷
লগতে পঢ়ক: SI কেলেংকাৰী সন্দৰ্ভত বিজেপিৰ মুখপাত্ৰ জয়ন্ত মল্ল বৰুৱাৰ প্ৰতিক্ৰিয়া
