ধুবুৰী, ১২ ফেব্ৰুৱাৰী: কোকৰাঝাৰ জিলাৰ পৰ্বতঝোৰাত আজিও সক্ৰিয় হৈ আছে চোৰাং গৰুৰ ৰমৰমীয়া ব্যৱসায় । এই ব্যৱসায় অব্যাহত থকাৰ সময়তে বৃহস্পতিবাৰে আৰক্ষীয়ে পুনৰ জব্দ কৰে ১৮ টাকৈ চোৰাং গৰু ।
বৃহস্পতিবাৰে নিশা নৱ নিযুক্ত পৰ্বতঝোৰা মহকুমা আৰক্ষী বিষয়া ত্ৰিনয়ন ভূঞাই এক গোপন তথ্যৰ ভিত্তিত অভিযান চলায় । ত্ৰিনয়ন ভূঞাৰ নেতৃত্বত কাজিগাঁও আৰু বগৰীবাৰী আৰক্ষীৰ যৌথ অভিযানত পৰ্বতঝোৰাৰ পৰা ধুবুৰীলৈ আহি থকাৰ সময়তে ১৮ টাকৈ চোৰাং গৰু জব্দ কৰা হয় । লগতে AS ১৬ D ৪৭৯২ নম্বৰৰ এখন মটৰ চাইকল আৰু হাশেম আলী নামৰ এজনক আটক কৰে আৰক্ষীয়ে ।
উল্লেখ্য যে, দীৰ্ঘদিন ধৰি এই চোৰাং গৰু পশ্চিম বংগৰ সোণাপুৰৰ শ্ৰীৰামপুৰ গেটেৰে ট্ৰাকেৰে আনি গোঁসাইগাঁৱৰ এক বিশেষ ঠাইত গোপনে নমাই ধুবুৰীৰ পৰা বাংলাদেশলৈ সৰবৰাহ কৰি আহিছে একাংশ দুষ্ট চক্ৰই । সম্প্ৰতি আটকাধীন লোকজনক আৰক্ষীয়ে জেৰা অব্যাহত ৰাখিছে । লোকজনৰ স্বীকাৰোক্তিত কেতবোৰ তথ্য পোহৰলৈ অহাৰ সম্ভাৱনা প্ৰকাশ কৰিছে আৰক্ষীয়ে ।
লগতে পঢ়ক:জনপ্ৰিয় নৃত্যশিল্পী স্বপ্না চৌধুৰীৰ বিৰুদ্ধে দাখিল এজাহাৰ
