ধুবুৰী, 4 ছেপ্টেম্বৰ : ‘‘যদি কোনো মাদ্ৰাছাত জেহাদী এজন বা দুজন পাইছে ধৰক ৷ গুলী মাৰি দিয়ক ৷ সকলোকে গুলীয়াই শেষ কৰি দিয়ক ৷ আমাৰ কোনো আপত্তি নাই । চৰকাৰে ধৰক আমি সহায় সহযোগ কৰিম । কিন্তু জেহাদী ধৰাৰ নামত অন্যায়ভাৱে ইছলামিক মাদ্ৰাছা ভঙা বা উচ্ছেদ কৰা আমি কেতিয়াও মানি লব নোৱাৰো ।"
দেওবাৰে এক সংবাদমেল আয়োজন কৰি সংবাদ মাধ্যমৰ আগত এই মন্তব্য কৰে সাংসদ বদৰুদ্দিন আজমলে (Badruddin Ajmal reacts to Madrasa demolition in Dhubri) ৷ লগতে সাংসদ বদৰুদ্দিন আজমলে মাদ্ৰাছা ভঙা বা উচ্ছেদ প্ৰসংগ লৈ আইনৰ আশ্ৰয় লোৱাৰ কথাও সদৰী কৰে । লগতে প্ৰয়োজনত উচ্চতম ন্যায়ালয়ৰ দ্বাৰস্থ হোৱাৰ কথাও উল্লেখ কৰে সাংসদগৰাকীয়ে ।
উল্লেখ্য যে, ৰাজ্যৰ বিভিন্ন স্থানত জেহাদীৰ বিৰুদ্ধে অভিযান চলাই কেইবাজনো লোকক জেহাদীৰে জড়িত থকাৰ অভিযোগত গ্ৰেপ্তাৰ কৰিছে আৰক্ষীয়ে । ইয়াৰে সমান্তৰালকৈ জেহাদীয়ে আশ্ৰয় লোৱা কেইবাখনো মাদ্ৰাছাত উচ্ছেদ চলাইছে অসম চৰকাৰে । জেহাদীৰ নামত মাদ্ৰাছা ভঙা বা উচ্ছেদ চলোৱাক কেন্দ্ৰ কৰি ৰাজ্যৰ শাসক বিৰোধী ৰাজনৈতিক যুদ্ধ অব্যাহত আছে ।
লগতে পঢ়ক : মাদ্ৰাছা উচ্ছেদ সন্দৰ্ভত প্ৰতিক্ৰিয়া দুই কংগ্ৰেছ বিধায়কৰ
মাদ্ৰাছা সন্দৰ্ভত বিৰোধীয়ে যদি শাসক পক্ষক সমালোচনা কৰিছে ৷ আনপিনে আকৌ শাসক পক্ষই বিৰোধীক আক্ৰমণ কৰা পৰিলক্ষিত হৈছে । এনে সময়তে সাংসদ বদৰুদ্দিন আজমলেও সংবাদ মাধ্যম যোগে এই সন্দৰ্ভত ব্যক্ত কৰিছে নিজৰ প্ৰতিক্ৰিয়া ৷ আনপিনে ৰাজ্যিক বিজেপিৰ সভাপতি ভৱেশ কলিতাই 2024 ত ৰাজ্যত বিজেপিৰ মডেল চলিব বুলি কৈ আজমলক সমালোচনা কৰে ৷ আনহাতে আজমলে আজি আৰু কয় যে বিজেপি দলত ভাঙোন আৰম্ভ হৈছে ৷ একেদৰে কংগ্ৰেছৰো কেইবাজনো বিধায়ক কেইদিনমানৰ ভিতৰতে এ আই ইউ ডি এফত যোগদান কৰিব বুলি উল্লেখ কৰে এ আই ইউ ডি এফৰ মুৰব্বী সাংসদ বদৰুদ্দিন আজমলে ।
লগতে পঢ়ক : শোণিতপুৰৰ চিতলমাৰিত প্ৰশাসনৰ উচ্ছেদ অভিযান অব্যাহত
