পূৱ বিলাসীপাৰা,9 জানুৱাৰী : পূৱ বিলাসীপাৰাৰ চাপৰ আৰক্ষীয়ে শনিবাৰে বহলপুৰৰ শেগুনঝাৰী গাঁৱৰ পৰা বৃহৎ পৰিমাণৰ নিচাযুক্ত টেবলেটসহ এজন সৰবৰাহকাৰীক আটক কৰে ৷ লোকজনৰ নাম বহলপুৰৰ শেগুনঝাৰী গাঁৱৰ নজৰ আলী বুলি জানিবলৈ দিছে পূৱ বিলাসীপাৰা আৰক্ষীয়ে ৷
আৰক্ষীৰ সুত্ৰই সদৰি কৰা অনুসৰি এক গোপন সুত্ৰৰ পম খেদি নজৰ আলীৰ ঘৰত চলোৱা অভিযানত জব্দ কৰে উক্ত নিচাযুক্ত টেবলেটখিনি ৷ নজৰ আলীৰ ঘৰৰ পিছফালে এই টেবলেট খিনি মাটত পুটি থোৱা আছিল বুলি জানিবলৈ দিছে আৰক্ষীৰ সুত্ৰই ৷
ইফালে,এই নিচাযুক্ত টেবলেট সৰবৰাহৰ লগত বিলাসীপাৰা এটা বৃহৎ চক্ৰ জড়িত আছে বুলি সন্দেহ প্ৰকাশ কৰিছে আৰক্ষীৰ সুত্ৰই ৷ যাৰ বাবে এই নিচাযুক্ত টেবলেট সৰবৰাহৰ বিষয়ত অঞ্চলটোৰ আন এজন লোকক আটক কৰি তদন্ত অব্যাহত ৰাখিছে বুলি জানিবলৈ দিছে পূৱ বিলাসীপাৰা আৰক্ষীয়ে ৷ উল্লেখ্য যে, জব্দ কৰা নিচাযুক্ত টেবলেটখিনিৰ বজাৰ মূল্য লক্ষাধিক টকাৰ হ'ব বুলি সন্দেহ কৰা হৈছে ৷
লগতে পঢ়ক : অসমৰ প্ৰতিজন নাগৰিকৰ মুৰত ২৪ হাজাৰ টকাৰ ধাৰৰ বোজা
