বিলাসীপাৰাত শোকাৱহ পথ দুৰ্ঘটনাত এজন ছাত্ৰৰ মৃত্যু

বিলাসীপাৰাৰ 31 নং ৰাষ্ট্ৰীয় ঘাইপথত সংঘটিত এক শোকাৱহ পথ দুৰ্ঘটনা ৷ বলেৰ' পিক আপ ভেনৰ খুন্দাত থিতাতে নিহত এজন ছাত্ৰ ৷

বিলাসীপাৰা, 24 ছেপ্টেম্বৰঃ বিলাসীপাৰাৰ 31 নং ৰাষ্ট্ৰীয় ঘাইপথৰ বেলতলীত মঙলবাৰে সংঘটিত এক শোকাৱহ পথ দুৰ্ঘটনাত থিতাতে নিহত হয় এজন দশম শ্ৰেণীৰ অধ্যয়নৰত ছাত্ৰ ৷ দীৰ্ঘদিন ৰাষ্ট্ৰীয় ঘাইপথটোৰ দুয়োপাৰে অবৈধ মাছৰ ব্যৱসায় অব্যাহত থকাৰ অভিযোগ উত্থাপিত হৈ থকাৰ সময়তে মঙলবাৰে পুৱা ঘাইপথটোৰ দাঁতিত ৰখাই থোৱা অৱস্থাত অবৈধ মাছ কঢ়িয়াই অনা এখন বলেৰ' বাহনক বিপৰীত দিশৰ পৰা অহা AS-01JC-7104 নম্বৰ বলেৰ' পিকআপ বাহনখনে প্ৰচণ্ড জোৰে খুন্দা মাৰে | উক্ত সংঘৰ্ষৰ ফলত মাছ কঢ়িয়াই অনা বাহনখনত শ্ৰমিকৰূপে কাম কৰি থকা ছাত্ৰজনৰ ঘটনাস্থলীতে মৃত্যু হয় ৷ নিহত ছাত্ৰজন হাকামা ৫ম খণ্ড গাঁৱৰ ছামাদ আলীৰ পুত্ৰ জাকাৰিয়া আলী বুলি জানিব পৰা গৈছে | ইফালে দুৰ্ঘটনাটো সংঘটিত হোৱাৰ পিছতেই সেই স্থানতেই অবৈধ মাছ বিক্ৰীত ব্যস্ত হৈ থকা ব্যৱসায়ীসকলে মাছ কঢ়িওৱা বাহনসহ ঘটনাস্থলীৰ পৰা পলায়ন কৰে ৷ অবৈধ মাছ ব্যৱসায়ৰ লগতে সমগ্ৰ ঘটনাৰ তদন্ত কৰি বিহিত ব্যৱস্থা গ্ৰহণৰ দাবী তুলিছে স্থানীয় ৰাইজে |