জোনাই, 8 আগষ্টঃ হাইদৰাবাদলৈ জীৱিকাৰ সন্ধানত যোৱা জোনাইৰ এজন যুৱক যোৱা পাঁচ মাহে সন্ধানহীন হৈ থকা এক ঘটনাই অন্ধকাৰ নমাই আনিছে এটা দৰিদ্ৰ পৰিয়াললৈ | ঘটনা অনুসৰি, জোনাইৰ সীমান্তৰ দঞি প'ল চাহ বাগানত দিন হাজিৰা কৰা মনোজ দলে নামৰ লোকজনৰ পুত্ৰ মিগাং দলে নামৰ প্ৰায় 20 বছৰীয়া যুৱকজনে হাইদৰাবাদত পূৰ্বৰে পৰা এটা কোম্পানীত কাম কৰি থকা একে গাঁৱৰে দাদা সম্পৰ্কীয় এজন যুৱকৰ লগত থাকি তেওঁ কৰা কোম্পানীতে প্ৰায় তিনি মাহ কাম কৰি সময়মতে ঘৰলৈও টকা পঠাইছিল ৷ কিন্তু এদিন হঠাতে সম্পৰ্কীয় দাদা জনৰ লগত কিবা কথাত মতানৈক্য হোৱাত দাদা সম্পৰ্কীয় যুৱকজনে মিগাং দলেক মাৰপিট কৰাৰ লগতে ম'বাইলো ভাঙি দিয়ে আৰু তাৰ পাছৰে পৰাই মিগাং দলে নামৰ যুৱকজন হাইদৰাবাদৰ পৰা সন্ধানহীন হৈ আছে ৷
আনফালে দিন হাজিৰা কৰা পিতৃ মাতৃয়ে হাইদৰাবাদ বা অন্য ঠাইলৈ গৈ নিজ পুত্ৰক বিচাৰি যাব নোৱাৰাত চকুৰ পানীৰে বাট নেদেখা অৱস্থাৰ সৃষ্টি হৈছে | সেয়ে কোনো লোকে মিগাং দলে নামৰ যুৱক জনৰ খবৰ পালে তেওঁৰ পিতৃ মনোজ দলেৰ 9366368123 নম্বৰত যোগাযোগ কৰিবলৈ অনুৰোধ জনাইছে পৰিয়ালৰ লোকে ৷
