ধেমাজি,10 ফেব্ৰুৱাৰী: যিসময়ত ৰাজ্য চৰকাৰে বৃহৎ সংখ্যক শিক্ষক নিযুক্তি প্ৰক্ৰিয়াৰে এক প্ৰকাৰ চমক সৃষ্টি কৰিছে তেনে সময়তে ইকৰা আৰু টিনৰ বেৰেৰে আৱৰা জৰাজীৰ্ণ গৃহতে জীৱনৰ আদি পাঠ গ্ৰহন কৰিছে এজাক শিক্ষাৰ্থীয়ে ৷ শূণ্য আন্তঃগাঁঠনি, নাই আচবাব, নাই পৰ্যাপ্ত ডেক্স বেঞ্চ, নাই দৰ্জা খিৰিকী ৷ এক প্ৰকাৰ জৰাজীৰ্ণ বাঁহৰ বেৰ আৰু টিনৰ বেৰৰ জলঙাইদি পোহৰ পৰে শ্ৰেণীকোঠাত ৷ একেদৰে প্ৰসাৱগাৰ-শৌচালয়ৰ লগতে বিদ্যালয়খনত নাই খোৱা পানীৰ সুব্যৱস্থা ৷ তেনেকৈয়ে চলিছে ধেমাজি শিক্ষা খণ্ডৰ অধীনৰ 4 নং টেকজুৰি বিষ্ণুপুৰ বালিকা মধ্য ইংৰাজী বিদ্যালয়খনৰ শিক্ষাদান প্ৰক্ৰিয়া ৷
2013 চনতে প্ৰাদেশীকৰণ হোৱা বিদ্যালয়খনত প্ৰধান শিক্ষক দিলীপ সজাতিসহ আন দুগৰাকী সহকাৰী শিক্ষক থকাৰ পাচত নতুনকৈ আৰু এগৰাকী শিক্ষকক নিযুক্তি দিয়া হৈছে ৷ তিনিটা শ্ৰেণী কোঠাত 45 গৰাকী ছাত্ৰ-ছাত্ৰী থকাৰ পাচতো শৈক্ষিক পৰিৱেশটো উন্নত কৰাত কোনো গুৰুত্ব দিয়া নাই ৰাজ্য চৰকাৰে ৷ চৰকাৰৰ বিভিন্ন আঁচনিৰ যোগেদি বিদ্যালয়খনৰ আন্তঃগাঁঠনি উন্নত কৰিবলৈ আহ্বান জনাই আহিছে বিদ্যালয় কৰ্তৃপক্ষৰ লগতে স্থানীয় লোকে ৷
প্ৰতিবছৰে ধুমুহাত তচনচ হোৱা বিদ্যালয়খনত বাৰিষা আহিলেই পানীৰে উপচি পৰে ৷ যাৰ ফলত পাঠদান কৰিব নোৱাৰা হয় ৷ স্থানীয় লোকৰ অভিযোগ, ৰাজ্য চৰকাৰে বৃহৎ সংখ্যক শিক্ষক নিযুক্তি দি এক নজিৰ সৃষ্টি কৰিলে নহ'ব, পিছ পৰা অঞ্চলৰ বিদ্যালয় সমূহৰ আন্তঃগাঁঠনিও উন্নত কৰিব লাগিব ৷
লগতে পঢ়ক: বিদ্যালয় প্ৰাদেশীকৰণত ভেঁকো-ভাওনাৰ অভিযোগ প্ৰাথমিক শিক্ষক সন্থাৰ
