জোনাই, 20 নৱেম্বৰ : শেহতীয়াকৈ ৰাজ্যৰ মুখ্যমন্ত্ৰীয়ে ঘোষণা কৰিছিল দুৰ্ঘটনাত মৃত্যু হোৱা লোকৰ যি মৃত্যুৰ প্ৰমাণ পত্ৰ (death certificate), সেইয়া মৃতকৰ পৰিয়াললৈ গৈ ঘৰে ঘৰে গৈ প্ৰদান কৰিব লাগিব আৰক্ষীয়ে ৷ কথা মতেই এতিয়া যেন কাম কৰি দেখুৱাইছে আৰক্ষী বিভাগে ৷ তৎকালীনভাৱে এই নিৰ্দেশ পালন কৰিছে জোনাই আৰক্ষীয়ে ৷
জোনাই আৰক্ষীয়ে যোৱা বৃহস্পতিবাৰে দুৰ্ঘটনাত নিহত হোৱা দুজন পৰিয়ালৰ ঘৰত উপস্থিত হৈ প্ৰদান কৰিলে মৃত লোক কেইজনৰ মৃত্যুৰ প্ৰমাণ পত্ৰ ৷ উল্লেখযোগ্য যে, জোনাই মহকুমাৰ লাইমেকুৰী অঞ্চলৰ দুজন যুৱকে যোৱা ৬ নৱেম্বৰত এক গাড়ী দুৰ্ঘটনাত প্ৰাণ হেৰুৱাইছিল ৷ সেই যুৱক দুজনৰ ঘৰত যোৱা বৃহস্পতি বাৰে জোনাই আৰক্ষীৰ ভাৰপ্ৰাপ্ত আৰক্ষী বিষয়া নেত্ৰ কমল শইকীয়া আৰু উপ পৰিদৰ্শক ৰবি ৰঞ্জন দাস উপস্থিত হৈ মৃতকৰ পৰিয়ালক চমজাই দিয়ে মৃত্যুৰ প্ৰমাণ পত্ৰ ৷
ইয়াৰ উপৰিও আৰক্ষীয়ে মৃতকৰ পৰিয়ালক প্ৰয়োজন হোৱা সকলো প্ৰকাৰৰ সহায় কৰাৰ আশ্বাস প্ৰদান কৰে ৷ অসম চৰকাৰ আৰু আৰক্ষী বিভাগৰ এনে পদক্ষেপক অশেষ ধন্যবাদ জনাইছে পৰিয়ালৰ লোক সকলে ৷
মন কৰিব লগীয়া বিষয় যে, ড৹ হিমন্ত বিশ্ব শৰ্মাই মুখ্যমন্ত্ৰী হৈ ৰাজ্যৰ গৃহ বিভাগৰ দায়িত্ব লোৱাৰ পিছতে সচৰাচৰ বিতৰ্কৰ আৱৰ্তত থকা ৰাজ্যৰ আৰক্ষী বিভাগত এতিয়া দেখা গৈছে বহু নজিৰ বিহীন পৰিৱৰ্তন ৷ ড্ৰাগছ তথা অবৈধ নিচা যুক্ত দ্ৰব্যৰ বিৰুদ্ধে অসম আৰক্ষীয়ে লোৱা প্ৰচেষ্টাৰো শলাগ লৈছে ৰাজ্যবাসীয়ে ৷ একেবাৰে শেহতীয়াকৈ, স্মাৰ্ট পুলিচিং( smart policing) ক্ষেত্ৰতো অসম আৰক্ষীয়ে দেশৰ সকলো ৰাজ্যৰ ভিতৰতে লাভ কৰিছে তৃতীয় স্থান ৷
লগতে পঢ়ক : Smart policing : দেশৰ ভিতৰত শীৰ্ষৰ তৃতীয় স্থানত অসম আৰক্ষী
