ধেমাজি, 18 ফেব্ৰুৱাৰীঃ চলিত বৰ্ষতে মুকলি হোৱাৰ পথত বহু প্ৰতিক্ষিত ব্ৰহ্মপুত্ৰৰ উত্তৰ পাৰৰ একমাত্ৰ উচ্চ শিক্ষা আৰু কাৰিকৰী শিক্ষাৰ প্ৰতিষ্ঠান ধেমাজি আভিযান্ত্ৰিক মহাবিদ্যালয় । 2011 চনৰ 20 ফেব্ৰুৱাৰীত ধেমাজি টেকজুৰিত প্ৰায় 268 বিঘা ভূমিত তদানীন্তন মুখ্যমন্ত্ৰী তৰুণ গগৈয়ে এই শিক্ষানুষ্ঠানখনৰ আধাৰশিলা স্থাপন কৰিছিল ৷
ইতিমধ্যে মহাবিদ্যালয়খনৰ নিৰ্মানকাৰ্য প্ৰায়ে সম্পূৰ্ণ হৈ উঠিছে ৷ মঙলবাৰে মহাবিদ্যালয়খনৰ ভৱন পৰিদৰ্শন কৰে লক্ষীমপুৰৰ সাংসদ প্ৰদান বৰুৱা লগতে ধেমাজিৰ বিধায়ক ৰণোজ পেগুৱে । ভৱন পৰিদৰ্শন কৰি সাংসদগৰাকীয়ে সাংবাদিকৰ আগত মন্তব্য কৰি কয় যে, তেখেত এই মহাবিদ্যালয়খনক লৈ আশাবাদী ৷ উচ্চ শিক্ষাৰ ক্ষেত্ৰখনত প্ৰতিষ্ঠানখনে যথেষ্ট অৱদান আগবঢ়াব ৷
উল্লেখ্য যে, মহাবিদ্যালয়খনৰ সৈতে সংযোগী পথটোৰ নিৰ্মানকাৰ্য এচ অ’ পি ডিৰ আধীনত প্ৰায় 10 কোটি টকাৰ পুঁজিৰে আৰম্ভ কৰা হ’ব ৷ লগতে মহাবিদ্যালয়খনত এমাহৰ ভিতৰতে পাঁচ হাজাৰ গছ পুলি ৰোপন কৰাৰ কথা ব্যক্ত কৰে বিধায়ক ৰণোজ পেগুৱে ৷
