ধেমাজিত নৱজাতকৰ মৃত্যু, চিকিৎসকৰ বিৰুদ্ধে গোচৰ

ধেমাজি অসামৰিক চিকিৎসালয়ত নৱজাত কন্যাৰ মৃত্যুৰ পাচতে চিকিৎসকৰ বিৰুদ্ধে গোচৰ ৰুজু কৰিছে পৰিয়ালৰ লোকে ৷ চিকিৎসক-নাৰ্চৰ চৰম হেমাহিৰ বাবেই নৱজাত শিশুটিয়ে অকালতে মৃত্যুক সাৱটি ল'বলগা হয় বুলি অভিযোগ উত্থাপন কৰিছে পৰিয়ালৰ লোকে ৷

ধেমাজি,18 অক্টোবৰ : ধেমাজি অসামৰিক চিকিৎসালয়ত এটি নৱজাতকৰ মৃত্যুক কেন্দ্ৰ কৰি তীব্ৰ প্ৰতিক্ৰিয়াৰ সৃষ্টি হৈছে ৷ ঘটনাৰ বিৱৰণী অনুসৰি, চিমেন চাপৰিৰ নিত্যা গগৈৰ পত্নী ভেলিনা ভূঞা গগৈয়ে ধেমাজি অসামৰিক চিকিৎসালয়ত বিভাগীয় চিকিৎসক ডাঙৰ টিকেন্দ্ৰজিৎ টাইডৰ তত্বাৱধানত অস্ত্ৰোপচাৰৰ জৰিয়তে এটি কন্যা সন্তান জন্ম দিছিল ৷ কিন্তু নাভি অংশত সামান্য বিসংগতি প্ৰত্যক্ষ কৰা বাবে চিকিৎসকগৰাকীয়ে শিশুৰোগ বিভাগৰ বিশেষজ্ঞ খগেন দলেৰ অধীনত চোৱা-চিতা কৰিবলৈ পৰামৰ্শ দিয়ে ৷ কিন্তু কেইঘণ্টামানৰ পাচত হঠাতে নৱজাতক সন্তানটিক চিকিৎসকে মৃত বুলি জনোৱাত পৰিয়ালৰ লোকে ঘটনাটোক সহজভাৱে ল'ব পৰা নাই ৷ শুকুৰবাৰে ধেমাজি অসামৰিক চিকিৎসালয়ত দণ্ডাধীশ উপস্থিত হৈ ঘটনাৰ অনুসন্ধান কৰি মৰণোত্তৰ পৰীক্ষাৰ ব্যৱস্থা কৰে ৷

পৰিয়ালৰ অভিযোগ অনুসৰি, চিকিৎসক-নাৰ্চৰ চৰম হেমাহিৰ বাবেই নৱজাত শিশুটিয়ে অকালতে মৃত্যুক সাৱটি ল'বলগীয়া হ'ল ৷ এই কৰুণ ঘটনাৰ বাবে শিশুৰোগ বিভাগৰ চিকিৎসক ডাক্তৰ খগেন দলেক দায়ী কৰিছে পৰিয়ালৰ লোকে ৷ ইয়াৰোপৰি,শিশুটিৰ মৃত্যু হোৱাৰ পাচত চিকিৎসক তথা নাৰ্চে মাতৃগৰাকীৰ চিকিৎসাৰ ক্ষেত্ৰতো চৰম হেমাহি কৰে বুলি মন্তব্য কৰিছে পৰিয়ালৰ লোকে ৷ ইয়াৰ পাচতে পৰিয়ালৰ লোকে ধেমাজি সদৰ আৰক্ষী থানা,ধেমাজি জিলা যুটীয়া স্বাস্থ্য সঞ্চালক আৰু চিকিৎসালয়খনৰ অধীক্ষকগৰাকীক অভিযোগ দাখিল কৰিছে ৷ ধেমাজি সদৰ আৰক্ষী থানাই গোচৰ ৰুজু কৰি তদন্ত অব্যাহত ৰাখিছে ৷

ইপিনে চিকিৎসালয়খনৰ চিকিৎসক-নাৰ্চৰ এনে অতপালি,গাফিলতি তথা অৰাজকতাক লৈ সৰৱ হৈ পৰিছে দল-সংগঠন ৷ এইক্ষেত্ৰত অসম জাতীয়তাবাদী যুৱ ছাত্ৰ পৰিষদৰ ধেমাজি জিলা সমিতিৰ জিলা সভাপতি প্ৰিয়াংকু চুতীয়াই তীব্ৰ প্ৰতিক্ৰিয়া প্ৰকাশ কৰি ঘটনাত জড়িতক শাস্তি প্ৰদানৰ দাবী তুলিছে ৷