ধেমাজি, ৪ মে:বাৰিষাৰ পূৰ্বেই ধেমাজিৰ জীয়াঢলত আৰ এম ই পদ্ধতিৰে নিৰ্মাণ কৰা মথাউৰিটো সম্পূৰ্ণ কৰাৰ বাবে যুদ্ধকালীন তৎপৰতা সংশ্লিষ্ট বিভাগৰ (Jiyadhal embankment construction in Dhemaji)৷ বিভাগটোৱে সমাগত বাৰিষাক লৈ ধেমাজিত ক্ষীপ্ৰতাৰে জীয়াঢলৰ আটাইকেইটা মথাউৰি নিৰ্মাণৰ কাম অব্যাহত ৰাখিছে ৷ বিশেষকৈ ধেমাজি জীয়াঢলৰ টেকজুৰি বৰ্মন গাঁৱৰ পৰা ধেমাজি চমৰাজানৰ ৰে'লৰ পথ আৰু ১৫নং ৰাষ্ট্ৰীয় ঘাইপথলৈকে মুঠ ছয় কিলোমিটাৰ দৈৰ্ঘৰ মথাউৰিটোৰ নিৰ্মাণ কাম ৮৫ শতাংশ সম্পূৰ্ণ হৈছে ৷
উল্লেখ্য যে পঞ্চাশ কোটি টকা ব্যয়সাপেক্ষে যোৱা বছৰৰ পৰা জীয়াঢলৰ সোঁ পাৰৰ মথাউৰিটো আৰ এম ই পদ্ধতিৰে নিৰ্মাণ কৰি আছে এটা বহুজাতিক নিৰ্মাণ সংস্থাই ৷ যোৱা বছৰ বাৰিষাৰ পৰা নিৰ্মীয়মান মথাউৰিটোৰ চমৰাজানৰ ৰে'ল আলিৰ সমীপত এটা অংশত ক্ষতি হৈছিল (Sluice Gate at Rally Ali of Chamarajan)৷ ফলত চৰকাৰৰ জলসম্পদ বিভাগে ক্ষতিগ্ৰস্ত অংশত শ্লুইচ গেট দিয়াৰ আঁচনি গ্ৰহণ কৰে ৷ এইক্ষেত্ৰত ধেমাজি জলসম্পদ বিভাগে উল্লেখ কৰা মতে, মথাউৰিৰ ক্ষতি হোৱা অংশত 1.16 কোটি ব্যয়সাপেক্ষে শ্লুইচ গেট নিৰ্মাণ হ'ব । কিন্তু এইবছৰ বাৰিষা সমাগত যদিও শ্লুইচ গেটৰ উমঘামেই নাই ৷
ইপিনে,আৰ এম ই পদ্ধতিৰে নিৰ্মাণ কৰি থকা জীয়াঢলৰ সোঁপাৰৰ মথাউৰিটোৰ সম্পৰ্কত নিৰ্মাণ সংস্থাটোৰ প্ৰকল্প বিষয়া দেৱজিত ডেকাই কয় যে বাৰিষাৰ পূৰ্বেই মথাউৰিটো সম্পূৰ্ণ হৈ উঠিলে এই মথাউৰিটোৰ পৰা ধেমাজিবাসীয়ে বানৰ পৰা সকাহ পাব ৷ এই মথাউৰিটোৰ পৰা যোৱা বছৰ বানতো বিশেষ ক্ষতি হোৱা নাছিল যদিও এটা অংশ বিশেষ কাৰণত ক্ষতিগ্ৰস্ত হৈছিল আবদ্ধ পানীৰ বাবেহে ৷ ইতিমধ্যে মাটিৰ কাম চলি আছে ৷ মে' শেষলৈ মথাউৰিটোৰ কাম সম্পূৰ্ণ হৈ উঠিব বুলি আশা কৰা হৈছে বুলি তেওঁ কয় ৷
সেইদৰে জীয়াঢলপৰীয়া স্থানীয় TMPKৰ নেতাও উন্নত প্ৰযুক্তিৰে নিৰ্মাণ কৰা মথাউৰিটোক লৈ যথেষ্ট আশাবাদী ৷ কিয়নো অঞ্চলবাসীৰ দীৰ্ঘদিনীয়া আন্দোলনৰ ফলশ্ৰুতিত লাভ কৰিছিল এনেধৰণৰ প্ৰযুক্তিৰ সমাহাৰ ঘটা মথাউৰি ৷ মন কৰিবলগীয়া যে ৰাজ্য চৰকাৰৰ জলসম্পদ বিভাগৰ বাবে খিৰতী গাই হৈ পৰা জীয়াঢল নদীৰ মথাউৰিসমূহৰ ভিতৰত এইবেলি সোঁপাৰৰ মথাউৰিটো সুৰক্ষিত হ'লে বহু দিনলৈ হয়তো জীয়াঢলপৰীয়া ৰাইজে বানৰ পৰা সকাহ পাব ৷
লগতে পঢ়ক:Suspected heroin seized: লাহৰিজানত সন্দেহযুক্ত হেৰ’ইনসহ আটক মহিলা সৰবৰাহকাৰী
