জোনাই, ১৬ জুন : ৰাজ্যৰ ভিন্ন প্ৰান্তত বছৰৰ দ্বিতীয়টো বানপানীয়ে ভয়ংকৰ ৰূপ লৈছে (Floods in Assam)। বানৰ কৱলত পৰিছে শ শ গাঁও । অসমৰ প্ৰায় প্ৰতিখন জিলাতে দেখা গৈছে বানৰ বিভীষিকা । স্তব্ধ হৈছে জনজীৱন ।
বাকী জিলাসমূহৰ দৰে ধেমাজি জিলাৰো বিভিন্ন প্ৰান্তত বানে লৈছে ৰুদ্ৰৰূপ (Floods affects Dhemaji)। তাৰ মাজতে এক বিশেষ দৃশ্যই সকলোকে উদ্বিগ্ন কৰি তুলিছে । জোনাইত বহু অঞ্চল বাঢ়নী পানীয়ে প্লাৱিত কৰাৰ সময়তে কণ কণ শিশুৱে একাঠু-একঁকাল পানীৰ মাজেৰে বিদ্যালয়লৈ গৈছে । হাতে হাতে কিতাপৰ বেগ লৈ কোনো মতে বিপদসংকুল পথ অতিক্ৰম কৰিছে কণ কণ শিক্ষাৰ্থীসকলে (Devastated road has harassed the people of Jonai)। বিদ্যালয় নহয় যেন পথাৰলৈহে গৈছে শিক্ষাৰ্থীসকল ।
ধেমাজি জিলাৰ জোনাই মহকুমাৰ অন্তৰ্গত অতিকৈ পিছপৰা বৰং কৃষ্ণপুৰ অঞ্চলৰ এই ঘটনা । জোনাইৰ মুৰৰ্কংচেলেক শিক্ষা খণ্ডৰ অন্তৰ্গত ২নং বৰং কৃষ্ণপুৰ আহোম প্রাথমিক বিদ্যালয়লৈ যোৱা বিধ্বস্ত পথছোৱাৰ বাস্তৱ প্ৰতিচ্ছবি এনেদৰে সংবাদমাধ্যমৰ জৰিয়তে পোহৰলৈ আহিছে ।
বছৰ বছৰ ধৰি কোনো ধৰণৰ মেৰামতি নকৰাৰ ফলত পথছোৱা পৰিণত হৈছে পথাৰলৈ । যাৰ ফলত ২ নং বৰং কৃষ্ণপুৰ আহোম প্রাথমিক বিদ্যালয়ৰ ছাত্ৰ-ছাত্রী, শিক্ষক তথা সেই পথৰ বাবে অঞ্চলটোৰ ৰাইজ চৰম যাতনা ভুগিবলগীয়া হৈছে । বিশেষকৈ কণ কণ ছাত্ৰ-ছাত্ৰীয়ে প্ৰতিদিনে বিধ্বস্ত পথেৰে বিপদসংকুল যাত্ৰা কৰিবলগীয়া হয় ।
কেৱল বাৰিষা বুলিয়ে নহয় বছৰৰ প্ৰায় প্ৰতিটো সময়তে এনে দুৰ্দশা ভোগ কৰিবলগীয়া হয় শিক্ষাৰ্থী তথা অঞ্চলটোৰ ৰাইজে । ইফালে বিদ্যালয়খনৰ কাষতে আছে বৰং কৃষ্ণপুৰ ৰাইজৰ নামঘৰ । উক্ত বিধ্বস্ত পথ পাৰ কৰি আহি নামঘৰত দৈনিক গাঁওখনৰ ৰাইজে কৰিবলগীয়া হয় নাম-কীর্তন । সেয়েহে স্থানীয় ৰাইজে উক্ত পথছোৱা অতি শীঘ্ৰে নিৰ্মাণ কৰি কণ কণ ছাত্ৰ-ছাত্ৰীৰ জীৱন সুৰক্ষিত কৰাৰ লগতে স্থানীয় ৰাইজৰ এক দীৰ্ঘদিনীয়া সমস্যা সমাধান কৰিবলৈ আহ্বান জনাইছে চৰকাৰ তথা জনপ্ৰনিধিসকলক ।
