জোনাই ৪ জুলাই : কৰ’ণাতংকৰ মাজতে সম্প্ৰতি সমগ্ৰ অসমতে বানে ত্ৰাসৰ সৃষ্টি কৰি আছে ৷ জোনাইৰ বেৰাচাপৰি লুহিজানৰ এক বৃহত্তৰ অঞ্চল চিয়াং লালী নদীৰ বাঢ়নী পানীৰ কবলত পৰা পৰিলক্ষিত হৈছে । সংহাৰী বানৰ কৱলত পৰি অঞ্চলটোৰ বানাক্ৰান্ত লোকসকলে নিজৰ ঘৰ-বাৰী এৰি মথাউৰিত আশ্ৰয় ল'বলগীয়া হয় ।
অৱশ্যে বিগত দুদিনৰ পৰা বৰষুণৰ পৰিমাণ কমি অহাত বৰ্তমান পানী হ্ৰাস পাইছে যদিও বানাক্ৰান্ত ৰাইজে বৰ্তমানো নিজ বাসগৃহলৈ উভতিব পৰা নাই ৷ কাৰণ অঞ্চলটোৰ পৰিস্থিতি এতিয়াও স্বাভাৱিক হোৱা নাই । মথাউৰিৰ ওপৰতে আশ্ৰয় লৈ থকা বানাক্ৰান্ত ৰাইজে খাদ্য, বিশুদ্ধ খোৱাপানী, পিন্ধিবলৈ এযোৰ কাপোৰৰ বাবে হাহাকাৰ কৰিবলগীয়া হৈছে।
জোনাই মহকুমা প্ৰশাসনে ইতিমধ্যে বানপীড়িত তথা মথাউৰিৰ ওপৰত আশ্ৰয় লোৱা বানাক্ৰান্ত ৰাইজক দুবাৰকৈ সাহাৰ্য প্ৰদান কৰিছে ৷ কিন্ত এয়া যেন পৰ্যাপ্ত নহয় ৷ এই বান সাহাৰ্য প্ৰদান কৰাত কিছু বিসংগতি হোৱা বুলি বানাক্ৰান্ত ৰাইজে অভিযোগ উথাপন কৰে ৷
উল্লেখ্য যে, বৰ্তমানো বান সাহাৰ্য পোৱা নাই জলডুবি গাঁৱৰ ৫ টাকৈ পৰিয়ালে । জানিব পৰা মতে, অঞ্চলটোৰ লোহিত দত্তৰ পৰিয়ালৰ 6 জন, ৰতন গগৈৰ পৰিয়ালৰ 6 জন, ফুলমনি মুণ্ডাৰ এজন , অজিত মুণ্ডাৰ পৰিয়ালৰ 3 জন আৰু ফুলেশ্বৰ সিংহৰ পৰিয়ালৰ 6 জন লোক চৰকাৰী বান সাহাৰ্যৰ পৰা বঞ্চিত হৈছে ৷
বঞ্চিত পৰিয়ালকেইটাৰ অভিযোগ মৰ্মে, একেখন গাঁৱৰ ৰাইজে দুবাৰকৈ চৰকাৰীভাৱে বান সাহাৰ্য পাইছে ৷ কিন্তু এই 5 টা পৰিয়ালৰ 22 জন লোকৰ নাম চৰকাৰী সাহাৰ্যৰ তালিকাৰ পৰা কৰ্তন কৰা হৈছে ৷
লগতে পঢ়ক : গা ধুবলৈ গৈ সলিল সমাধি যুৱকৰ
