মঙলদৈ,15 মে’: দৰং জিলাৰ বাঘৰবাৰী গাঁৱৰ মৃদুল কলিতাৰ পুত্ৰ "জিউৰ" জটিল ৰোগৰ চিকিৎসাৰ বাবে সামাজিক মাধ্যমত ৰাইজৰ সহায় বিচাৰি এটি পোষ্ট শ্বেয়াৰ কৰিছিল মৃদুল কলিতা নামৰ লোকজনে ৷ মৃদুল কলিতাৰ সেই পোষ্টটো শ্বেয়াৰ কৰিছিল চৰাইদেউৰ শিশিৰ কুমাৰ গগৈ নামৰ এজন যুৱকে ৷
তাৰ পিছতেই বিভিন্নজনৰ পৰা দান-বৰঙণি সংগ্ৰহ কৰি ধন আত্মসাৎ কৰাৰ ফন্দি পাতিছিল শিশিৰ কুমাৰ গগৈয়ে ৷ শিশিৰ কুমাৰ গগৈৰ জালিয়াতিৰ সন্দেহ কৰি বাঘৰবাৰী ৰেনেচা ক্লাবৰ সভাপতি নৱ কুমাৰ শৰ্মা, সহ সম্পাদক প্ৰশান্ত ডেকাই মঙলদৈ আৰক্ষী থানাত ৰুজু কৰিলে এটি গোচৰ ।
বেংগালুৰুত চিকিৎসাধীন দৰঙৰ মৃদুল কলিতাৰ পুত্ৰ “জিউৰ” চিকিৎসাৰ বাবে গগৈৰ নিজা ফেচবুক পোষ্টৰ গুগল পে’ নম্বৰ ব্যৱহাৰ কৰি ৫-৮ লাখ টকা আত্মসাৎ কৰিছিল অভিযুক্ত যুৱকজনে ।
মঙলদৈ আৰক্ষী থানাৰ ভাৰপ্ৰাপ্ত বিষয়া ডাণ্টেজিত দেউৰী আৰু আৰক্ষী বিষয়া ভাৰত দলৈৰ নেতৃত্বত সাপেখাতী আৰক্ষীৰ সহযোগত আৰক্ষীৰ এটা দলে স্বগৃহৰ পৰা আটক কৰে অভিযুক্ত গগৈক । ইতিমধ্যে কেইবাটাও জামিনবিহীন গোচৰত গ্ৰেপ্তাৰ কৰা হৈছে শিশিৰ কুমাৰ গগৈক । চৰাইদেউৰ বহুকেইটা সামাজিক অনুষ্ঠানৰ লগত জড়িত আছিল ধৃত যুৱকজন ।
উল্লেখ্য যে, অসমৰ বহু কেইগৰাকী জনপ্ৰিয় শিল্পী, কলা-কুশলীৰ লগতে অসমৰ বিভিন্ন স্থানৰ সচেতন লোকে যিটো সময়ত জিউৰ চিকিৎসাৰ বাবে সঁহাৰি জনাইছে, তেনে সময়ত অভিযুক্ত যুৱকজনৰ এনে কাৰ্যই সকলোৰে চকু কপালত তুলিছে ৷
