দৰং,2 ছেপেম্বৰ: উঠি অহা নৱ প্ৰজন্মক ক্ৰীড়াৰ প্ৰতি আকৰ্ষিত কৰিবলৈ ৰাজ্য চৰকাৰে গ্ৰহণ কৰিছে কিছু অভিলাসী আঁচনি ৷ শেহতীয়া কেইবছৰ মানত আন্তৰাষ্ট্ৰীয় পৰ্যায়ত অসমৰ কেইবা গৰাকীও খেলুৱৈ উজ্বলি উঠাৰ পাছতে ক্ৰীড়া বিষয়টোত অধিক সচেতন হৈ পৰিছে ৰাজ্য চৰকাৰ ৷ কোটি কোটি টকা ব্যয় কৰি ৰাজ্যৰ বহু কেইখন জিলাত ষ্টেডিয়াম নিৰ্মাণ কৰাৰো সিদ্ধান্ত গ্ৰহণ কৰিছে অসম চৰকাৰে ৷
কিন্তু ইয়াৰ মাজতে উপেক্ষিত হৈ ৰৈছে ৰাজ্যৰ বহু প্ৰবীন খেলুৱৈ ৷ যিয়ে জীৱনৰ এচোৱা দীঘলীয়া সময় ক্ৰীড়াৰ নামতে পাৰ কৰিছে ৷ আজি আমি আপোনালোকক চিনাকী কৰাই দিব খুজিছো তেনে এজন ক্ৰীড়াবিদৰ সৈতে যিগৰাকীয়ে 90 ৰ দশকত বিভিন্ন ক্ৰীড়া প্ৰতিযোগিতাত অংশগ্ৰহণ কৰি পাঁচ শতাধিক পুৰস্কাৰ পাবলৈ সক্ষম হৈছিল ৷ আনকি ৰাষ্ট্ৰীয় পৰ্যায়তো অসমৰ হৈ প্ৰতিনিধিত্ব কৰি সুনাম কঢ়িয়াই আনিছিল খেলুৱৈ গৰাকীয়ে ৷ এই খেলুৱৈ গৰাকী হৈছে ছিপাঝাৰৰ ঈশ্বৰ চন্দ্ৰ নাথ ৷
বেংকৰ পৰা ঋণ লৈ বিভিন্ন খেল খেলিছিল ঈশ্বৰ চন্দ্ৰ নাথে ৷ কিন্তু কোনো এখন চৰকাৰেই সহায় নকৰিলে ঈশ্বৰক নাথক ৷ অকণমান সহায়ৰ বাবে বহু কেইজন জনপ্ৰতিনিধিৰ ওচৰ চাপিয়ো কোনোধৰণৰ সহায় লাভ নকৰিলে ঈশ্বৰ চন্দ্ৰ নাথে ৷ অৱশেষত চৰকাৰ-প্ৰশাসন বাদেই ঈশ্বৰৰ ওপৰতো বিশ্বাস হেৰুৱাই পেলাইছে ঈশ্বৰ নাথে ৷
খেলুৱৈ গৰাকীয়ে অত্যন্ত দুখ আৰু ক্ষোভেৰে আমাৰ সাংবাদিকৰ আগত কৈ গ'ল বহু কথা ৷ খেলুৱৈ ঈশ্বৰ চন্দ্ৰ নাথে কয় " মই দৌৰ, সাঁতোৰ, চাইক্লিং আদি বিভিন্ন ইভেণ্টত অংশগ্ৰহণ কৰি মেডেল, ট্ৰফী, প্ৰশংসা পত্ৰ পাবলৈ সক্ষম হৈছোঁ ৷ ৰাজ্যিক আৰু ৰাষ্ট্ৰীয় পৰ্যায়ত প্ৰায় পাঁচ শতাধিক পুৰস্কাৰ পাবলৈ সক্ষম হৈছো; কিন্তু আজিলৈকে কোনো ধৰণৰ চৰকাৰী সুবিধা লাভ নকৰিলো ৷ যদি মোৰ ঘৰুৱা অৱস্থা ভাল হ'ল হেতেন মই আৰু ভাল ফলাফল দেখুৱাব পাৰিলোহেতেন ৷"
আনকি এটা চাকৰিৰ কাৰণে গুৱাহাটীলৈ 27 দিন চাইকেল লৈ যোৱাৰ কথাও জনালে খেলুৱৈ গৰাকীয়ে ৷ বৰ্তমান দিন হাজিৰা কৰি ঘৰ চলোৱা খেলুৱৈ গৰাকীয়ে এতিয়াও তেঁওৰ প্ৰমাণ পত্ৰ, ট্ৰফী, মেডেলসমূহ সযতনে ৰাখিছে ৷ উপায়ন্তৰ হৈ কিবা এটা সংস্থাপন দিবৰ বাবে মুখ্যমন্ত্ৰী ড৹ হিমন্ত বিশ্ব শৰ্মাৰ চৰকাৰখনলৈ কাতৰ অনুৰোধ জনাইছে প্ৰবীন খেলুৱৈ ঈশ্বৰ চন্দ্ৰ নাথে ৷
লগতে পঢ়কঃ চতিয়ালৈ আহি কিয় অভিভূত হৈ পৰিল হিমন্ত বিশ্ব শৰ্মা ?
