দৰং, 9 জানুৱাৰীঃ যিগৰাকী ছাত্ৰই আত্মবলিদান দি অসমীয়া ভাষাক মাধ্যম হিচাপে ওভতাই অনাত অৰিহনা যোগাইছিল সেইজনা ছহিদৰ নামত তাহানিৰ চৰকাৰে কটন বিশ্ববিদ্যালয়ত স্মৃতিৰ সাক্ষৰ হিচাপে এটি ছাত্ৰবাস বনায় ৷ ভাষা আন্দোলনৰ প্ৰথম ছহিদগৰাকীৰ প্ৰতি ইমানতেই কৰণীয় সমাপ্ত সদৌ অসম ছাত্ৰ সন্থা বা চৰকাৰৰ ৷
গুৱাহাটী আৰু ডিব্রুগড় বিশ্ববিদ্যালয় দুখনে শিক্ষাৰ মাধ্যম আঞ্চলিক ভাষা অসমীয়া কৰিবলৈ যুক্তিসন্মত সিদ্ধান্ত লোৱাৰ লগে লগেই 1972 চনত বিভীষিকা আহি পৰিল ৷ অসম বিধানসভায়ো 1972 চনৰ 23 ছেপ্টেম্বৰত কাছাৰৰ কাৰণে সুকীয়া বিশ্ববিদ্যালয় স্থাপনৰ প্ৰস্তাৱ গ্ৰহণ কৰাত ছাত্ৰ সন্থাই সমগ্ৰ অসমত ছাত্ৰ আৰু ৰাইজক সজাগ কৰি আন্দোলনৰ কার্যপন্থা গ্ৰহণ কৰে ৷ এই আন্দোলনৰ প্ৰভাৱ দৰঙৰ মঙলদৈতো পৰিল ৷ 1972 চনৰ 5 অক্টোবৰ, অসম ছাত্ৰ সন্থাৰ আহ্বান মৰ্মে সেইদিনা মঙলদৈ চৰকাৰী উচচতৰ মাধ্যমিক বিদ্যালয়ৰ অষ্টম শ্ৰেণীৰ ছাত্ৰ ফুলকুমলীয়া মোজাম্মিল হকেও আন স্কুলীয়া স্বেচছাসেৱকৰ লগত 18 কিঃমিঃ আঁতৰৰ খাৰুপেটীয়াত পিকেটিং কৰিবলৈ গৈছিল ৷ তাতেই এচাম দুৰ্বৃত্তৰ হাতত প্ৰহৃত হৈ 6 অক্টোবৰৰ দিনা সকলোকে কন্দুৱাই মোজাম্মিল গুচি গৈছিল অচিন-অজান দেশলৈ ৷
মাত্ৰ 15 বছৰ বয়সত চিৰ চেনেহী ভাষা জননীৰ পূজাৰ বেদীত প্ৰাণ আহুতি দিয়া 72ৰ ভাষা আন্দোলনৰ প্ৰথম ছহিদ মোজাম্মিলৰ এই ত্যাগ অসাৰ প্ৰতিপন্ন হ'ল ৷ ছহিদৰ ত্যাগক কাহানিও স্মৰণ নকৰা খোদ সদৌ অসম ছাত্ৰ সন্থায়ো এই ক্ষেত্ৰত অতি অনাসক্ত পদক্ষেপ গ্ৰহণ কৰে ফলত আজি এগৰাকী ছহিদ ভাতৃ হিচাপে আক্ষেপ অনুভৱ কৰে ছহিদ মোজাম্মিল হ'কৰ জেষ্ঠ ভাতৃ নৰুল হ'কে ৷
লগতে পঢ়ক: ৰাজ্যজুৰি আছুৰ ৰণশিঙা প্ৰতিবাদ
