দৰং, 3 জানুৱাৰী: দৰং জিলা প্ৰশাসনৰ উদ্যোগত অসম চৰকাৰৰ প্ৰজ্ঞান ভাৰতীৰ অধীনত ড° বাণীকান্ত কাকতি বঁটা প্ৰদান অনুষ্ঠান মঙলদৈ জিলা পুথিভড়ালত অনুষ্ঠিত হয় । দৰং জিলাৰ পৰা কলা, বাণিজ্য আৰু বিজ্ঞান শাখাত প্ৰথম বিভাগত উত্তীৰ্ণ হোৱা মুঠ 909 গৰাকী ছাত্ৰীক স্কুটি প্ৰদান কৰা হ’ব ।
অৱশ্যে দেওবাৰে প্ৰথম পৰ্যায়ত জিলাখনৰ বিভিন্ন অঞ্চলৰ মাত্ৰ 5 গৰাকী মেধাৱী ছাত্রীক স্কুটী প্ৰদান কৰে জিলা প্ৰশাসনে ৷ বাকী থকা ছাত্ৰীসকলক বিদ্যালয় পৰ্যায়ত স্কুটি বিতৰণ কৰাৰ কথা প্ৰকাশ কৰে মন্ত্ৰী সিদ্ধাৰ্থ ভট্টাচাৰ্যই ৷
বঁটা প্ৰদান অনুষ্ঠানত উপস্থিত থাকে ছিপাঝাৰৰ বিধায়ক বিনন্দ শইকীয়া, মঙলদৈ বিধায়ক গুৰুজ্যোতি দাস, সাংসদ দিলিপ শইকীয়া, জিলা উপায়ুক্তকে ধৰি বহু কেইজন গণ্য মান্য ব্যক্তিৰ লগতে জিলাখনৰ দুই শতাধিক ছাত্র-ছাত্ৰী আৰু অভিভাৱক । ইফালে, মেধাৱী ছাত্রীসকলে নিজৰ যোগ্যতা অৰ্জন কৰি এইদৰে স্কুটী পাই আনন্দিত হৈ পৰা লগতে চৰকাৰক ধন্যবাদ জ্ঞাপন কৰে ৷
লগতে পঢ়ক: শিৱসাগৰৰ ৯৪৮ গৰাকী ছাত্ৰীক স্কুটি প্ৰদান
