চিৰাং, 29 অক্টোবৰঃ সুদুৰ কন্যাকুমাৰীৰ পৰা স্কুটী চলাই অসমত আহি উপস্থিত হৈছে এগৰাকী বিশেষভাৱে সক্ষম লোক ৷ বিবেকানন্দ শিলান্যাসৰ 50 বৰ্ষপূৰ্তি উপলক্ষে "এক ভাৰত বিজয়ী ভাৰত"ৰ বাণীৰে অসমত আহি উপস্থিত হোৱা লোকজন হৈছে অভিযন্তা শ্ৰী থাংগা ৰাজা ৷
বিবেকানন্দ কেন্দ্ৰ বিদ্যালয়ৰ প্ৰাক্তন ছাত্ৰ তথা বিশেষভাৱে সক্ষম অভিযন্তাগৰাকীয়ে কন্যাকুমাৰীস্থিত বিবেকানন্দ শিলান্যাসৰ 50 বৰ্ষপূৰ্তি উপলক্ষে সমগ্ৰ ভাৰত ভ্ৰমণ কৰি অসমত উপস্থিত হয় ৷ অসমৰ চিৰাং জিলাৰ কাজলগাঁৱস্থিত বিবেকানন্দ কেন্দ্ৰীয় বিদ্যালয়ত উপস্থিত হোৱা অভিযন্তাগৰাকীক বিদ্যালয়খনৰ শিক্ষক আৰু শিক্ষাৰ্থীসকলে উষ্ম আদৰণি জনাই ৷
বিগত 2 ছেপ্টেম্বৰৰ পৰা নিজৰ যাত্ৰা আৰম্ভ কৰা শ্ৰী থাংগা ৰাজাই 101 দিনৰ ভ্ৰমণ সামৰি পুনৰ কন্যাকুমাৰীত উপস্থিত হ'ব ৷ বিবেকানন্দ কেন্দ্ৰ বিদ্যালয়ত শ্ৰী থাংগা ৰাজাক ভাৰতীয় সেনাবাহিনীৰ লগতে বিদ্যালয়খনৰ প্ৰধান শিক্ষক অনুপ সোনাৰে এই যাত্ৰাৰ বাবে আদৰণি জনায় ৷ "এক ভাৰত বিজয়ী ভাৰত"ৰ মহান বাণীৰে সমগ্ৰ ভাৰত ভ্ৰমণ কৰা এই অভিযন্তাগৰাকী ছাত্ৰ সমাজৰ লগতে সমগ্ৰ ভাৰতবাসীৰ বাবেই এক প্ৰেৰণা উৎস ৷
