চিৰাং,27 মে’: বুধবাৰে চিৰাঙৰ বাসুগাঁৱৰ 30 খন বিচনা যুক্ত চিকিৎসালয় ভ্ৰমণ কৰে চিদলীৰ বিধায়ক জয়ন্ত বসুমতাৰীয়ে ৷ বিধায়ক গৰাকীয়ে বিগত 18 বছৰে বন্ধ হৈ থকা চিকিৎসালয়খন পৰিভ্ৰমন কৰে আৰু মুখ্যমন্ত্ৰীৰ সৈতে আলোচনা কৰি চিকিৎসালয়খন কাৰ্যক্ষম কৰি তোলাৰ প্ৰতিশ্ৰুতি প্ৰদান কৰে ।
উল্লেখ্য যে, বাসুগাঁৱত বিগত 2004 চনতে বিটিচি গঠনৰ পিচত 30 খন বিচনা যুক্ত চিকিৎসালয় নিৰ্মাণ কৰা হৈছিল বাসুগাঁও পৌৰসভাৰ 2নং ৱাৰ্ডৰ খাগ্ৰাবাৰীত । চিকিৎসালয় খনৰ সকলো আচবাব অতি সুন্দৰভাৱেই নিৰ্মাণ কৰা হৈছিল । আনকি কেইবা কোটি টকা খৰচ কৰি চিকিৎসকৰ বাবে আবাসিক গৃহও নিৰ্মাণ কৰিছিল চৰকাৰে । কিন্তু আটক ধুনীয়াকৈ নিৰ্মাণ কৰা চিকিৎসালয় খন নিৰ্মাণ কৰা হ’ল যদিও বিগত 18 বছৰে মুকলিহে নহ’ল ।
বৰ্তমান উক্ত চিকিৎসালয়ত গৰু-ছাগলীৰ জিৰণি চ’ৰা আনকি একাংশ লোকৰ জুৱা খেলৰ আড্ডা তথা মদ্যপানৰ ঘাটিলৈহে পৰিণত হৈছে । চাৰিওকাষ ঘন জংঘলেৰে আৱৰি পৰিছে উক্ত চিকিৎসালয়খন । কোটি টকীয়া চিকিৎসালয় এতিয়া জহি খহি যাব ধৰিছে । ইফালে বিটিচি প্ৰশাসন বা অসম চৰকাৰে কোনো গুৰুত্ব দিয়া পৰিলক্ষিত হোৱা নাছিল । আনকি কোনো নেতা, মন্ত্ৰী তথা বিধায়কেও পৰিদৰ্শন কৰিবলৈ অহা নাছিল চিকিৎসালয়খন । প্ৰায়ে এই অভিযোগ উত্থাপন কৰি আহিছে স্থানীয় ৰাইজে ৷
বুধবাৰে বিধায়ক জয়ন্ত বসুমতাৰীয়ে এই পৰিতক্ত অৱস্থাত পৰি ৰোৱা চিকিৎসালয় খন যিকোনো প্ৰকাৰে অতি শীঘ্ৰে সোনকালে কাৰ্যক্ষম কৰি তোলা হ’ব বুলি মন্তব্য প্ৰকাশ কৰে । যিহেতু মুখ্যমন্ত্ৰীয়ে অসম খনক উন্নত ৰাজ্য হিচাপে গঢ় দিয়াৰ চিন্তা কৰি আছে । সেয়ে বিশ্বাস মুখ্যমন্ত্ৰীৰে আলোচনা কৰি ইয়াক কাৰ্যক্ষম কৰি তোলাৰ চেষ্টা কৰা হ’ব বুলি প্ৰতিশ্ৰুতি প্ৰদান কৰে বিধায়ক জয়ন্ত বসুমতাৰীয়ে ।
বিটিআৰৰ সকলো প্ৰয়োজনীয় ঠাইত চিকিৎসালয় স্থাপনৰ ওপৰত বিটিআৰৰ মুখ্য প্ৰমোদ বড়োৱে গুৰুত্ব দিছে আৰু সেয়ে সকলোৱে গুৰুত্ব সহকাৰে লৈ আগবাঢ়ি যাব বুলিও উল্লেখ কৰে বিধায়ক গৰাকীয়ে । তেওঁ লগতে বাসুগাঁও চহৰত অগ্নি নিৰ্বাপক কেন্দ্ৰ স্থাপন আৰু শিক্ষানুষ্ঠান গঢ়ি তোলাৰ ওপৰতো গুৰুত্ব প্ৰদান কৰে চিদলীৰ বিধায়ক জয়ন্ত বসুমতাৰীয়ে ৷
লগতে পঢ়ক: বুদ্ধ পূৰ্ণিমাৰ বাবে বন্ধ থাকিল লাওখোৱা সহকাৰী স্বাস্থ্য কেন্দ্ৰ
