ডিব্ৰুগড় ,৪ আগষ্ট: কেতিয়াবা ভাল খবৰবোৰ কোনো আগজাননী নিদিয়াকৈয়ে আহে । যেতিয়া তেনে হয়, তেতিয়াই আনন্দৰ বন্যা বয় । সেমেকি উঠে দুচকু, বৈ আহে আনন্দাশ্ৰু । যেতিয়া সকলো আশা হেৰায় যায় আৰু তাৰপাছত হেৰায় যোৱা আশাই দুৱাৰত খুন্দিয়াই তেতিয়া উঠে উলাহৰ ঢল ৷
শুকুৰবাৰে সোণাৰিৰ এটা পৰিয়ালত আগজাননী নিদিয়াকৈয়ে আহিলে এটা ভাল খবৰ । সুদীৰ্ঘ ৫০ বছৰৰ পাছত সোণাৰিৰ এটা পৰিয়ালত বৈছে আনন্দৰ বন্যা । সুদুৰ অন্ধ্ৰ প্ৰদেশৰ পৰা সোণাৰিৰ আইদেউবাৰী পালেহি ইন্দ্ৰ বাহাদুৰ নেৱাৰ । পিছে ইন্দ্ৰ বাহাদুৰ নেৱাৰ উপস্থিত হোৱাক লৈ কিয় আনন্দত আত্মহাৰা হৈ পৰিছে পৰিয়ালটো ?
আনন্দিত হোৱাৰে কথা । কিয়নো, ১৯৭৬ চনতে ঘৰৰ পৰা ওলাই যোৱা আত্মীয়ক পাই আৱেগিক হৈ পৰিল সোণাৰিৰ আইদেউবাৰীৰ পৰিয়ালটি । জানিব পৰামতে ১৯৭৬ চনৰ কোনোবা এটা দিনত ঘৰৰ পৰা হঠাৎ নিৰুদ্দেশ হৈছিল ২২ বছৰীয়া এজন চফল ডেকা ।
দিন বাগৰিল সুদীৰ্ঘ ৫০ টা বছৰে ঘৰৰ লগত যোগাযোগ নহ'ল ১৯৭৬ চনত ২২ বছৰ বয়সত ওলাই যোৱা ইন্দ্ৰ বাহাদুৰ নেৱাৰৰ । কিন্তু সুদীৰ্ঘ ৫০ টা বছৰত পাছত ৭২ বছৰ বয়সত শুকুৰবাৰে ৫০ বছৰ আগতে এৰি যোৱা আপোন ঘৰখন বিচাৰি উপস্থিত হ'ল ইন্দ্ৰ বাহাদুৰ । ৫০ বছৰে যোগাযোগ বিছিন্ন হোৱা আত্মীয়ক ঘূৰাই পাই আৱেগিক হৈ পৰিল চৰাইদেউ আইদেউবাৰীৰ পৰিয়ালটো ।
উল্লেখযোগ্য যে, চৰাইদেউ আইদেউবাৰীৰ ঘৰৰ পৰা ওলাই যোৱা ইন্দ্ৰ বাহাদুৰে বিগতে প্ৰায় ৫০ টা বছৰে অন্ধ্ৰ প্ৰদেশত নিজকে সংস্থাপিত কৰি বৈবাহিক সম্বন্ধততো আৱদ্ধ হৈছিল । পাছত ইন্দ্ৰই পুত্ৰ শংকৰৰ সহায়ত চৰাইদেউ জিলাৰ সোণাৰিৰ আইদেউবাৰীত বসবাস কৰা কণিষ্ঠ ভাতৃ কুল বাহাদুৰৰ ঠিকনা লাভ কৰি শুকুৰবাৰে পুত্ৰৰ সৈতে উপস্থিত হয়হি ভাতৃৰ বাসগৃহত । এক দীৰ্ঘ পৰিক্ৰমাৰ অন্তত ৫০ বছৰ পাছত মিলন হ'ল দুই ভাতৃৰ । আনন্দত সেমেকি উঠিল ভাতৃৰ দুচকু ।
