সৰুপথাৰ চৰকাৰী শৌচালয় নিৰ্মাণত ব্যাপক অনিয়ম

প্ৰতিগৰাকী বিপিএল পৰিয়ালক শৌচালয় নিৰ্মাণ বাবে চৰকাৰে আৱণ্টন দিয়ে ১২,৩০০ টকা

গোলাঘাট, ১১ মাৰ্চঃ গোলাঘাটৰ সৰুপথাৰ পৌৰসভাৰ ২ নং ৱাৰ্ডত চৰকাৰী শৌচালয় নিৰ্মাণত ব্যাপক অনিয়মৰ অভিযোগ হিতাধিকাৰীৰ । শৌচাগাৰ নিৰ্মাণৰ বাবে হিতাধিকাৰীক ঠিকাদাৰে নিম্নমানৰ ইটা,বালি, টিন আদি যোগান ধৰাৰ অভিযোগ কৰে হিতাধিকাৰীসকলে । উল্লেখযোগ্য যে, প্ৰতিগৰাকী বিপিএল পৰিয়ালক শৌচালয় নিৰ্মাণ বাবে চৰকাৰে ১২,৩০০ টকা আৱণ্টন দিয়ে । কিন্তু সেই টকাৰ সদব্যৱহাৰ হোৱা নাই সৰুপথাৰ পৌৰ সভাত । ঠিকাদাৰৰে পৌৰ সভাৰ বিষয়া কৰ্মচাৰীৰে গোপন বুজাবুজি কৰি হিতাধিকাৰীক দাবি ধমকি দি নিম্নমানৰ সামগ্ৰীৰে শৌচাগাৰ নিৰ্মাণ কৰি দিয়া বুলি অভিযোগ উত্থাপন কৰে হিতাধিকাৰীয়ে । আনহাতে, শৌচালয় নিৰ্মাণ সম্পূৰ্ণ নহওতেই হিতাধিকাৰীক ঠগ প্ৰৱঞ্চনা কৰি ফটো তুলিবলৈও ঠিকাদাৰে জো যা চলাইছে বুলি অভিযোগ কৰে হিতাধিকাৰীয়ে । যাৰ পৰিপ্ৰেক্ষিতত ঠিকাদাৰৰ বিৰুদ্ধে আইনী ব্যৱস্থা ল'বলৈ সাজু হৈছে ভুক্তভোগী হিতাধিকাৰী ।