গুৱাহাটী, ১০ মে': অসমৰ লগতে গুৱাহাটী মহানগৰী কুখ্যাত সন্ত্ৰাসবাদীৰ আক্ৰমণৰ লক্ষ্য হোৱাৰ সন্দেহত সষ্টম হৈ পৰিছে আৰক্ষী প্ৰশাসন । এই সম্পৰ্কত বিভিন্ন বিভাগসমূহলৈ মহানগৰ আৰক্ষী আয়ুক্ত দীপক কুমাৰে বিশেষ সতৰ্কবাণীও প্ৰেৰণ কৰিছে । ঠায়ে ঠায়ে আৰক্ষী তথা প্ৰশাসনে সজাগতামূলক সভাৰ আয়োজন কৰা পৰিলক্ষিত হৈছে ।
কুখ্যাত সন্ত্ৰাসবাদী সংগঠন আইএছআইএছে মা কামাখ্যা ধামত কূটাঘাতকাৰী আক্ৰমণ চলোৱাৰো সম্ভাৱনা ব্যক্ত কৰা হৈছে । এই লৈ এতিয়া মন্দিৰ পৰিচালনা সমিতি আৰু আৰক্ষী প্ৰশাসনৰ মাজত এক উচ্চস্তৰীয় বৈঠক অনুষ্ঠিত কৰা হয় । বৈঠকত উপস্থিত থাকি কামৰূপ মহানগৰ জিলা উপায়ুক্ত বিশ্বজিৎ পেগু, দীপক কুমাৰ, জয়ন্ত বৰুৱাকে ধৰি বহুকেইজন আৰক্ষী বিষয়াই নিৰাপত্তাজনিত দিশ, অম্বুবাচী সন্দৰ্ভত আলোচনা কৰে । অম্বুবাচী উপলক্ষ্যে মন্দিৰৰ নিৰাপত্তা অধিক কটকটীয়া কৰাৰ কথা উল্লেখ কৰে আৰক্ষী আয়ুক্তগৰাকীয়ে ।
