শিলচৰ, 7 জুলাই : শিলচৰৰ এটা আৱাসিক অঞ্চলত অৱস্থিত এটা বিশেষ বাসগৃহই অঞ্চলবাসীক কৰি তুলিছে লজ্জানত ৷ দীৰ্ঘদিনৰ পৰা বাসগৃহটোত বিভিন্ন অসামাজিক কাৰ্য সংঘটিত হৈ অহাৰ অভিযোগ উত্থাপন হৈছে ৷ অভিযোগ অনুসৰি, নিউ শিলচৰৰ হাইলাকান্দি ৰ’ডত অৱস্থিত শান্তিপুৰৰ বাসুদেৱ নগৰৰ বাসগৃহটোত সংঘটিত হৈ আহিছিল বহু অসামাজিক কাৰ্যকলাপ ৷ স্থানীয় লোকে জনোৱা মতে, নিতৌ বাসগৃহটোলৈ আগমন ঘটে বহু সন্দেহজনক লোকৰ ৷ শিক্ষিত তথা এখন ভদ্ৰ সমাজৰ লোকেৰে পৰিপূৰ্ণ অঞ্চলটোত শেহতীয়াকৈ সংঘটিত অসামাজিক তথা উশৃংখল কাণ্ডই লজ্জিত কৰি তুলিছিল অঞ্চলবাসীক ৷
অৱশেষত, বাসগৃহটোত চলা আৰক্ষীৰ অভিযানত আৰক্ষীৰ দলটোৱে দুগৰাকী মহিলাসহ পাঁচজন লোকক আটক কৰিবলৈ সক্ষম হয় ৷ ইতিমধ্যে আটকাধীন আটাইকেইগৰাকী লোকক থানালৈ লৈ যায় আৰক্ষীয়ে ৷ স্থানীয় লোকৰ অভিযোগ অনুসৰি, বাসগৃহটোত বহুদিনৰ পৰা চলি থকা নাৰীদেহ ব্যৱসায়ৰ ৰেকেটটো চলাই গৈছিল জনৈক দেৱী আৰু বৰভূঞা উপাধিৰ দুগৰাকী মহিলাই ৷ নতুন নতুন বিভিন্ন লোকৰ সমাগম ঘটা এই বাসগৃহটোলৈ আহ-যাহ চলিছিল বহু যুৱকৰ ৷
অঞ্চলটোত সংঘটিত এই অসামাজিক কাৰ্যকলাপৰ বিৰুদ্ধে অঞ্চলবাসীয়ে বহুবাৰ আৰক্ষীক অৱগত কৰাৰ অন্তত ৰঙীৰখৰি আৰক্ষী চকীৰ এটা দলে সন্দেহজনক বাসগৃহটোত অভিযান চলাই দুই মহিলাসহ মুঠ পাঁচজনক আটক কৰে আৰক্ষীয়ে ৷
শেহতীয়াকৈ শিলচৰ চহৰৰ বিভিন্ন স্থানত সংঘটিত হৈ অহা বহু অসামাজিক তথা অপৰাধমূলক কাৰ্যই চিন্তিত কৰি আহিছে শিলচৰবাসীক ৷ এনে সময়তে হাইলাকান্দি ৰ’ডত অৱস্থিত শান্তিপুৰৰ বাসুদেৱ নগৰত এটা নাৰী দেহ ব্যৱসায়ৰ ঘাটি উৎখাতৰ ঘটনাৰ পাচতে শিলচৰবাসীয়ে প্ৰশংসা কৰিছে আৰক্ষীক ৷
লগতে পঢ়ক : অচিনাক্ত দুৰ্বৃত্তই হত্যা কৰিলে গৃহৰক্ষী জোৱানক
