বঙাইগাঁও,৫ নৱেম্বৰ : বঙাইগাঁও জিলাত ৰাজহুৱা বিতৰণ ব্যৱস্থাত দুৰ্নীতিৰ অভিযোগ । এগৰাকী সমবায় এজেণ্টৰ বিৰুদ্ধে ব্যাপক দুৰ্নীতিৰ অভিযোগ ৰাইজৰ । সুদীপ সূত্ৰধৰ নামৰ এজেণ্টজনে ২নং নোৱাপাৰা গাঁৱৰ বহুতৰে ৰেচন কাৰ্ডবোৰ (Ration card) বিভিন্ন অজুহাত দেখুৱাই নিজৰ হাতত জমা লৈছিল । কিন্তু সেই দিন ধৰি আজিলৈ লোকসকলক ৰেচন প্ৰদান কৰা নাই সুদীপে ।
কেৱল এয়া নহয় ৰেচন বন্ধ হোৱা বুলি গাঁওবাসীক আভুৱা ভৰি আহিছে সুদীপে । ৰাইজে ৰেচন কাৰ্ডৰ বিষয়ে প্ৰশ্ন কৰিলেই বিভিন্ন ধৰণৰ অজুহাত দেখুৱাই এজেণ্টজনে । আনকি এজেণ্টজনে ৰেচন কাৰ্ড জমা লৈ হিতাধিকাৰীক চাউল কমকৈ দিবলৈ আৰম্ভ কৰিছে বুলিও অভিযোগ কৰে ৰাইজে ।
ইফালে ৰেচন নোপোৱাত এতিয়া গাঁওখনৰ দৰিদ্ৰ পৰিয়ালবোৰে বিভিন্ন সমস্যাত পৰিছে । সেয়ে অৱশেষত ৰাইজে সংবাদমাধ্যমৰ সন্মুখত এজেণ্টজনৰ কুকৰ্মৰ বিষয়ে অৱগত কৰে ।
লগতে এজেণ্টজনৰ বিৰুদ্ধে অসামৰিক খাদ্য যোগান বিভাগত (Department of Civil Food Supply) লিখিত অভিযোগো দাখিল কৰিছে ৰাইজে । চৰকাৰক এই ক্ষেত্ৰত ব্যৱস্থা গ্ৰহণ কৰিবলৈ আহ্বান জনাইছে । অভিযুক্ত এজেণ্টৰ বিৰুদ্ধে তদন্ত কৰি উচিত শাস্তি প্ৰদানৰো দাবী জনাইছে ভুক্তভোগী ৰাইজে ।
