বঙাইগাঁও, 3 মেঃ প্ৰতিজন কৰ'ণা যোদ্ধাক ৰাষ্ট্ৰীয়ভাৱে সন্মান জনোৱা সময়তে বঙাইগাঁৱত ভাৰাঘৰৰ মালিকৰ মানসিক অত্যাচাৰৰ সন্মুখীন হৈছে স্বয়ং প্ৰশাসনৰ উচ্চ পদস্থ বিষয়াৰ পৰিয়াল । ঘটনা সন্দৰ্ভত জানিব পৰা মতে, জিলাখনৰ বৰপাৰাৰ নিবাসী, প্ৰাক্তন অতিৰিক্ত উপায়ুক্ত ৰোহিনী চৌধুৰীৰ ঘৰত ভাৰাতীয়া হিচাপে থকা বঙাইগাঁৱৰ অতিৰিক্ত উপায়ুক্তৰ পৰিয়ালক শীঘ্ৰে ঘৰ এৰি যাবলৈ হেঁচা প্ৰয়োগ কৰিছে ঘৰৰ মালিকে ৷ দীৰ্ঘ দিন ধৰি ভাৰাঘৰৰ মালিকৰ মানসিক অত্যাচাৰ বলি হৈছে পৰিয়ালটো ৷
ৰাজ্যৰ শেহতীয়া পৰিস্থিতিৰ প্ৰতি লক্ষ্য ৰাখি দিনে নিশাই নিজ কৰ্তব্য কৰি থকা জিলা অতিৰিক্ত উপায়ুক্ত অনুপম ডেকাই বিগত বহু দিনৰ পৰা এখন হোটেলত বাহৰ পাতি আছে ৷ কৰ্তব্যৰ মাজতে সময়ে সময়ে পৰিয়ালক এপাক চাবলৈ আহে বিষয়াগৰাকীয়ে ৷ ফলত মালিকপক্ষই ভাৰা ঘৰ এৰিবলৈ নিৰ্দেশ দিছে পৰিয়ালটোক ৷ আনহাতে, খোদ প্ৰশাসনৰ লগত জড়িত হৈয়ো ভাৰাঘৰৰ মালিকপক্ষই এনে মানসিকতা ৰখাটো নিন্দাজনক বুলি মন্তব্য কৰে বহু সচেতন লোকে লগতে জিলা প্ৰশাসনক এই ক্ষেত্ৰত ব্যৱস্থা গ্ৰহনৰ দাবী জনাইছে সচেতনমহলে ৷
