বৰপেটা, 27 নৱেম্বৰঃ পুনৰ যুৱতীক প্ৰেমৰ জালত পেলাই বহিঃৰাজ্যত বিক্ৰী কৰাৰ চেষ্টাৰ দৰে ঘটনা পোহৰলৈ আহিছে ৷ বৰক্ষেত্ৰীৰ লোহাৰকাঠাস্থিত এ.পি.জে আব্দুল কালাম জুনিয়ৰ একাডেমীৰ ছাত্ৰী এগৰাকীক একেখন বিদ্যালয়ৰে শিক্ষক এগৰাকীয়ে বহিঃৰাজ্যত বিক্ৰীৰ চেষ্টা কৰাৰ অভিযোগ ইত্থাপিত হৈছে ৷
প্ৰাপ্ত তথ্য অনুসৰি একাডেমী খনৰ ছাত্ৰী নিবাসত থাকি উচ্চতৰ মাধ্যমিক প্ৰথম বৰ্ষৰ বিজ্ঞান শাখাত অধ্যয়ন কৰি আহিছিল বৰক্ষেত্ৰীৰ কুৰিহামাৰী চৰৰ ছাত্ৰী গৰাকীয়ে ৷ ছাত্ৰী গৰাকীৰ অভিযোগ অনুসৰি একাডেমী খনৰ ইংৰাজী শিক্ষক তথা একাডেমী পৰিচালনা সমিতিৰ সম্পাদক আমিনুৰ ইছলামে পাঁচ মাহ পূৰ্বে তেওঁৰ লগতে প্ৰেমৰ সম্পৰ্ক স্থাপন কৰিছিল ৷ আৰু বিগত 25 নৱেম্বৰত তেওঁক অভিযুক্ত আমিনুৰ ইছলামে বিক্ৰীৰ বাবে একাডেমীৰ পৰা আন ঠাইলৈ পঠিয়াই দিছিল ৷ ইপিনে ছাত্ৰী গৰাকীক পৰিয়ালৰ লোকে ছাত্ৰী নিবাসৰ পৰা নিবলৈ আহোতেই ছাত্ৰী গৰাকী নিৰুদ্দেশ বুলি শিক্ষক আমিনুৰ ইছলামে পৰিয়ালয়ৰ লোকক জানিবলৈ দিয়ে ৷ ইয়াৰ পাচতে ছাত্ৰী গৰাকীৰ পৰিয়ালৰ লোকে এই সন্দৰ্ভত মুকালমুৱা আৰক্ষী থানাত এখন এজাহাৰ দাখিল কৰে ৷
ইপিনে মতিউৰ ৰহমান নামৰ আন এজন যুৱকে ছাত্ৰী গৰাকীক হাজো থানালৈ লৈ যায় ৷ আৰু তাৰ পাচতে সমগ্ৰ ঘটনা পোহৰলৈ আহে ৷ প্ৰকৃততে মতিউৰ ৰহমান আৰু শিক্ষক আমিনুৰ ইছলামে ছাত্ৰী গৰাকীক বহিঃ ৰাজ্যত বিক্ৰীৰ প্ৰস্তুতি চলাইছিল ৷ মতিউৰ ৰহমানে হোৱাট্চাপ যোগে বহু জনক ছাত্ৰী গৰাকীৰ ফটো প্ৰেৰণ কৰিছিল ৷ আৰু দুই-এদিনৰ ভিতৰতে যুৱতী গৰাকীক বহিঃৰাজ্যলৈ পঠিয়াই দিয়াৰ পৰিকল্পনা কৰিছিল মতিউৰে ৷ আনহাতে ছাত্ৰী গৰাকীৰ স্বীকাৰুক্তিৰ ভিত্তিত মুকালমুৱা আৰক্ষীয়ে মতিউৰ আৰু আমিনুৰ ইছলামক আটক কৰি মঙলবাৰে নলবাৰী আদালতত হাজিৰ কৰে ৷ আৰু দুয়োজনকে নলবাৰী আদালতে জেললৈ প্ৰেৰণ কৰে ৷
