বৰপেটাৰোড, 17 মাৰ্চ : দুগ্ধনগৰী খ্যাত সৰভোগৰ জামাদাৰবড়ীৰ জীয়ৰী আছিল বাছিৰণ নেছা নামৰ মহিলাগৰাকী ৷ উপযুক্ত সময়ত উপযুক্ত পাত্ৰৰ সৈতে বিবাহপাশত আৱদ্ধ হৈছিল বাছিৰণ নেছা ৷ পিছে বিবাহৰ পিছতহে লাগিল কেণা ৷ অভিযোগ মতে, দোমনীৰ লালচান্দ মিঞা নামৰ ব্যক্তিগৰাকীয়ে বিবাহৰ পিছৰে পৰা পত্নীক মাজে-সময়ে চলাই আহিছিল নিৰ্যাতন ৷
প্ৰাপ্ত তথ্য অনুসৰি, বিবাহৰ পিছত এবাৰ বাছিৰণে স্বামীয়ে চলোৱা নিৰ্যাতন সহিব নোৱাৰি বিহপান কৰি আত্মহত্যাৰ চেষ্টা চলাইছিল (woman attemt to suicide in Barpetaroad) ৷ তাৰপিছৰে পৰা কিন্তু স্বামী-স্ত্ৰীৰ মাজত কোনো ধৰণৰ কাজিয়া সংঘটিত নোহোৱা বুলি দাবী কৰে মহিলাগৰাকীৰ স্বামীয়ে ৷
পৰৱৰ্তী সময়ত, অৰ্থাৎ বুধবাৰে আকস্মিক মৃত্যুক সাৱটি লয় বাছিৰণ নেছা নামৰ মহিলাগৰাকীয়ে ৷ বুধবাৰে মহিলাগৰাকীৰ স্বামী পৰিয়ালৰ লোকে তেওঁক ভৰ্তি কৰাইছিল বৰপেটাৰোডৰ এখন চিকিৎসালয়ত ৷ চিকিৎসকে মহিলাগৰাকীক পৰীক্ষা কৰি আদবাটতে মৃত্যু হোৱা বুলি ঘোষণা কৰে ৷ তাৰপিছতে মহিলাগৰাকীৰ মৃতদেহটো স্বামী পৰিয়ালৰ লোকে ঘৰলৈ উভতাই নিব বিচৰাত বাধা প্ৰদান কৰে চিকিৎসালয় কৰ্তৃপক্ষই ৷
ইয়াৰ বিপৰীতে যিহেতু মহিলাগৰাকীয়ে চিকিৎসালয়ত উপস্থিত হোৱাৰ পূৰ্বে মৃত্যুক সাৱটি লৈছিল, তেনেক্ষেত্ৰত এই মৃত্যু স্বাভাৱিক নে অস্বাভাৱিক সেয়া জানিবলৈ মৰণোত্তৰ পৰীক্ষা কৰা উচিত বুলি চিকিৎসালয় কৰ্তৃপক্ষই দাবী কৰে ৷ তদুপৰি মহিলাগৰাকীৰ মৃত্যু সন্দৰ্ভত চিকিৎসালয়ৰ সন্দেহ ওপজাত খবৰ দিয়ে আৰক্ষীক ৷ খবৰ লাভ কৰা মাত্ৰকে দণ্ডাধীশ পাৰ্থপ্ৰতিম খনিকৰৰ সৈতে বৰপেটাৰোড আৰক্ষীৰ এটা দল উপস্থিত হয় উক্ত চিকিৎসালয়ত ৷ আৰক্ষীয়ে পৰৱৰ্তী সময়ত মহিলাগৰাকীৰ মৃতদেহটো বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয় হাস্পতাললৈ মৰণোত্তৰ পৰীক্ষাৰ বাবে প্ৰেৰণ কৰে ৷
ইফালে জীয়ৰীৰ আকস্মিক মৃত্যুক সহজভাৱে ল’ব নোৱাৰি বাছিৰণৰ পিতৃ পৰিয়ালৰ লোকে ইয়াক পৰিকল্পিত হত্যাকাণ্ড বুলি দাবী কৰিছে ৷ মৃত বাছিৰণৰ পিতৃয়ে তেওঁৰ জীয়ৰীক স্বামী আৰু শাহুৱেকে মিলি হত্যা কৰা বুলি দাবী কৰে ৷ মৰণোত্তৰ পৰীক্ষাৰ ফলাফলেহে স্পষ্ট কৰিব মহিলাগৰাকীৰ মৃত্যুৰ প্ৰকৃত ৰহস্য ৷
লগতে চাওক: বালিকুৰিত নগদ ধনৰ বাবদ ভুৱা পৰীক্ষাৰ্থীক পৰীক্ষাত বহিবলৈ দিয়াৰ অভিযোগ
