বৰপেটা, 28 অক্টোবৰ: ৰাজস্থানত উদ্ধাৰ হ'ল বৰপেটাৰ নিৰুদিষ্ট যুৱতী ৷ সোমবাৰে কেইবামাহ ধৰি নিৰুদ্দেশ হৈ থকা সৰভোগৰ এগৰাকী যুৱতীক ৰাজস্থানৰ নাৰী দেহ ব্যৱসায়ীৰ কৱলৰ পৰা উদ্ধাৰ কৰে সৰভোগ আৰক্ষীয়ে ৷ প্ৰাপ্ত তথ্য অনুসৰি, সৰ্থেবাৰীৰ এজনে যুৱকে সৰভোগৰ যুৱতীগৰাকীক কেইবামাহ পূৰ্বে প্ৰেমৰ ছলনাৰে ফুচুলাই নি দেহ ব্যৱসায়ীৰ হাতত বিক্ৰী কৰিছিল ৷
ঘটনাৰ বিৱৰণী মতে, নিজকে হাউলীৰ কালঝাৰৰ গকুল চক্ৰৱৰ্তী বুলি পৰিচয় দিয়া সৰ্থেবাৰীৰ ৰঙিয়া-নদীৰপাম গাঁৱৰ ছাইফুল আলি নামৰ নাৰী সৰবৰাহকাৰীয়ে সৰভোগৰ এগৰাকী যুৱতীক বিগত জানুৱাৰী মাহত প্ৰেমৰ ছলনা কৰি বিয়া কৰোৱাৰ প্ৰতিশ্ৰুতি দি পলুৱাই লৈ গৈছিল ৷ বঙাইগাঁৱৰ পৰা ৰে'লযোগে যুৱতী গৰাকীক দিল্লীলৈ নি দিল্লীত পোন্ধৰ দিন ৰাখি পৰৱৰ্তী সময়ত ৰাজস্থানত বিক্ৰী কৰি দিছিল ছাইফুল আলীয়ে ৷ সৰভোগ আৰক্ষীয়ে তদন্ত কৰি যুৱতীগৰাকীক পলুৱাই নিয়া ছাইফুল আলীক বিগত চাৰি মাহ পূৰ্বে সৰ্থেবাৰীৰ ৰঙিয়া-নদীৰপাম গাঁৱৰ পৰা গ্ৰেপ্তাৰ কৰি বৰপেটা জেললৈ প্ৰেৰণ কৰিছিল ৷ ছাইফুল আলী নামৰ নাৰীসৰবৰহকাৰীজনৰ স্বীকাৰোক্তিৰ ভিত্তিতে সৰভোগ আৰক্ষী থানাৰ ভাৰপ্ৰাপ্ত আৰক্ষী বিষয়া সঞ্জীৱ কুমাৰ দাসৰ নেতৃত্বত অভিযান চলাই সুদূৰ ৰাজস্থানৰ পৰা যুৱতী গৰাকীক উদ্ধাৰ কৰিবলৈ সক্ষম হয় আৰক্ষীয়ে ৷
