পাষাণ পুত্ৰই ৰে'লৱে ষ্টেচনত এৰি থৈ গ'ল বৃদ্ধা মাতৃক

বৰপেটাৰ সৰ্থেবাৰীৰ এগৰাকী 77 উৰ্ধৰ বৃদ্ধাক পুত্ৰই ৰে'লৱে ষ্টেচনত এৰি থৈ যোৱাৰ অভিযোগ ৷ হতাশাত আত্মহত্যাৰ চেষ্টা দুৰ্ভগীয়া বৃদ্ধা মাতৃ গৰাকীৰ ৷

বৰপেটা,17 এপ্ৰিলঃ বৰপেটাৰোডত মঙলবাৰে নিশা সংঘটিত হ'ল এক অমানৱীয় ঘটনা ৷ পুত্ৰই বৃদ্ধা মাতৃক ৰে'লৱে ষ্টেচনত এৰি থৈ যোৱাৰ অভিযোগ ৷ হতাশাত আত্মহত্যাৰ চেষ্টা কৰে দুৰ্ভগীয়া বৃদ্ধা মাতৃ গৰাকীয়ে ৷

বৰপেটাৰ সৰ্থেবাৰীৰ এই বৃদ্ধা গৰাকীৰ নাম বিভাহ সাহা ৷ বৃদ্ধা গৰাকীয়ে জনোৱা অনুসৰি তেখেত ৰাধেশ্যাম সাহা, চন্দন সাহা আৰু সঞ্জীত সাহা নামৰ তিনিজন পুত্ৰ আৰু 3 গৰাকী কন্যা সন্তানৰ মাতৃ ৷ বৃদ্ধা গৰাকীৰ তিনিও গৰাকী পুত্ৰই পত্নীৰ স'তে ভাড়াঘৰত থাকে আৰু কন্যা কেইগৰাকীক ইতিমধ্যে বিয়া দিছে বুলি বৃদ্ধা গৰাকীয়ে জানিবলৈ দিয়ে ৷ ইপিনে 77 বছৰীয়া বৃদ্ধা গৰাকীৰ পুত্ৰ চন্দন সাহাৰ লগত জাগীৰোডৰ এটা ভাৰাঘৰত থাকে বুলি জনায় বৃদ্ধা গৰাকীয়ে ৷ অভিযোগ অনুসৰি দীৰ্ঘদিন ধৰি বৃদ্ধা গৰাকীৰ বোৱাৰীয়ে তেখেতক অকথ্য নিৰ্যাতন চলাই আহিছিল ৷ অৱশেষত পুত্ৰ চন্দন চাহায়ে মঙলবাৰে বৃদ্ধা গৰাকীক বৰপেটাৰোডৰ ৰেলৱে ষ্টেচনত এৰি থৈ যায় বুলি অভিযোগ বৃদ্ধা মাতৃ গৰাকীৰ ৷ ইপিনে বৃদ্ধা গৰাকীৰ অভিযোগ অনুসৰি তেখেতৰ আন দুগৰাকী পুত্ৰ ৰাধেশ্যাম সাহা আৰু সঞ্জীত সাহায়েও তেখেতৰ খবৰ লবলৈ আহৰি নাপায় ৷ সেয়ে হতাশা আৰু বেদনাত দুৰ্ভগীয়া বৃদ্ধা মাতৃ গৰাকীয়ে বুধবাৰে পুৱা আত্মহত্যাৰ চেষ্টা চলাই যদিও স্থানীয় ৰাইজে বৃদ্ধা গৰাকীক উদ্ধাৰ কৰে ৷ পৰৱৰ্তী সময়ত স্থানীয় ৰাইজে বৃদ্ধা গৰাকীক বৰপেটাৰোড আৰক্ষী থানাত চমজাই দিয়ে ৷