বৰপেটা, ১৯ মাৰ্চ: শুকুৰবাৰে মনোনয়ন পত্ৰ দাখিল কৰিলে বৰপেটা জিলাৰ সৰুক্ষেত্ৰী সমষ্টিৰ অসম গণ পৰিষদৰ প্ৰাৰ্থী কল্পনা পাটোৱাৰীয়ে । দলৰ নেতা-কৰ্মীসকলে প্ৰাৰ্থীগৰাকীক উৎসাহিত কৰাৰ বাবে বৰপেটা চহৰত হস্তী লগত লৈ বিশাল সমদল উলিয়ায় । সৰুক্ষেত্ৰী সমষ্টি দখলৰ লক্ষ্যৰে মিত্ৰজোঁট সমৰ্থিত অগপৰ প্ৰাৰ্থী কল্পনা পাটোৱাৰীয়ে এইবাৰ নিৰ্বাচনত প্ৰতিদ্বন্দিতা কৰিব । শুকুৰবাৰে বৰপেটা জিলা উপায়ুক্ত কাৰ্যালয়ত উপস্থিত হৈ তেওঁ মনোনয়ন পত্ৰ দাখিল কৰে ।
মনোনয়ন পত্ৰ দাখিল কৰি প্ৰাৰ্থীগৰাকীয়ে সাংবাদিকৰ আগত কয় যে, এয়া এক আবেগিক মুহূৰ্ত আৰু এক গধুৰ দায়িত্ব ৷ তেওঁ অভিযোগ উত্থাপন কৰে যে, সৰুক্ষেত্ৰীৰ ৰাইজক কংগ্ৰেছ আৰু এ আই ইউ ডি এফে প্ৰতাৰণা কৰি আহিছে । কংগ্ৰেছী বিধায়ক জাকিৰ হুছেইনে সমষ্টিটোৰ ২ শতাংশ কাম কৰি গুৱাহাটীত টিভি চেনেলে আয়োজন কৰা অনুষ্ঠানত দিল্লীৰ মুখ্যমন্ত্ৰী অৰবিন্দ কেজৰিৱালৰ দৰে নিজৰ প্ৰশংসা কৰি আছে বুলি তেওঁ কটাক্ষ কৰে ৷
তেওঁ কয় যে, কেজৰিৱালে কাম কৰি দেখুৱাইছে আৰু জাকিৰ হুছেইনে কথাৰ ফুলজাৰি মাৰি ফুৰিছে ৷ লগতে সৰুক্ষেত্ৰীৰ উন্নয়নৰ বিষয়ে দেখুৱাবলৈ বিধায়কগৰাকীয়ে কেমেৰা ঘূৰাই ফুৰিছে বুলিও পাটোৱাৰীয়ে মন্তব্য কৰে ৷ সৰুক্ষেত্ৰীত অগপৰ বিজয় নিশ্চিত বুলিও দাবী কৰে কল্পনা পাটোৱাৰীয়ে ৷ লগতে বিধায়িকা হিচাপে নিৰ্বাচিত হ'লে ৰাইজৰ আশা-আকাংক্ষা পূৰণ কৰিব লাগিব বুলিও তেওঁ মন্তব্য কৰে ।
লগতে পঢ়ক:প্ৰীতি ক্ৰিকেট খেলত গোলাঘাট সাংবাদিক সংস্থাৰ জয়লাভ
