জনীয়া, 30 এপ্ৰিল : এফালে কভিড-19 ৰ সন্ত্ৰাস আৰু আনফালে নদীৰ গৰাখহনীয়াই নিদ্ৰা হৰণ কৰিছে অৰ্ধ-শতাধিক পৰিয়ালৰ ৷ কলগাছিয়া ৰাজহ চক্ৰৰ অন্তৰ্গত সুতিৰপাথাৰ আৰু চৰ খাৰবাল্লী গাঁৱত বেঁকী নদীৰ খহনীয়াই এসপ্তাহৰ ভিতৰতে খহাই লৈ গ'ল কুৰিটাতকৈ অধিক পৰিয়ালৰ ভেটি-মাটি ৷ উল্লেখযোগ্য যে, কিছুদিন পূৰ্বে হৈ যোৱ প্ৰৱল ধুমুহাই ঘৰ-দুৱাৰ তচনচ কৰাৰ পিছত পুনৰবাৰ গৰাখহনীয়াত ঘৰ-মাটি হেৰুৱাই দিশহাৰা হৈছে বহু পৰিয়াল ৷ লক-ডাউনৰ বাবে দৰিদ্ৰ লোকৰ মাজত এফালে খাদ্য সংকট আৰু আনফালে গৰাখহনীয়াই অঞ্চলটোৰ সুতিৰপাথাৰ, খাৰবাল্লী, ডাউকমাৰী আদি গাঁৱত চলাইছে তাণ্ডৱ । যাৰবাবে বৰ্তমান উপায়বিহীন হৈ গছৰ তলতেই দিন কটাবলগীয়া হৈছে বহু পৰিয়ালে ৷
আনহাতে প্ৰতিবছৰে বেঁকী নদীৰ খহনীয়াই অঞ্চলবাসীক জুৰুলা কৰি অহাৰ পিছতো বিভাগীয় কতৃপক্ষই খহনীয়া ৰোধ কৰাৰ বাবে কোনো ধৰণৰ ব্যৱস্থা গ্ৰহণ নকৰাত ক্ষুব্ধ হৈ পৰিছে ৰাইজ ৷ আনকি বিগত এটা সপ্তাহে বহুবোৰ পৰিয়ালে ঘৰ-মাটি হেৰুৱাই পথৰ দাতিত আশ্ৰয় লোৱাৰ পিছতো কোনো জন-প্ৰতিনিধিয়ে খবৰ নোলোৱাত চৰকাৰ তথা প্ৰতিনিধিৰ ওপৰত ক্ষোভ উজাৰিছে ভুক্তভোগীয়ে ৷
লগতে পঢ়ক : কপিলী নৈত সন্ধানহীন এজন
