বৰপেটা, ২২ জুলাইঃ বৰপেটাৰ সমাজ কল্যাণ বিভাগৰ বহু কৰ্মীয়ে লাভ কৰা নাই পাঁচ মাহৰ দৰমহা ৷ ২০১৮ চনৰ অক্টোবৰ মাহৰ পৰা এইসকল অংগনবাড়ী কৰ্মী বঞ্চিত হৈ আহিছে মাহেকীয়া প্ৰাপ্য দৰমহাৰ পৰা ৷ আনকি এইসকল অংগনবাড়ী কৰ্মীৰ দৰমহাৰ ধন মোকলাই দিবৰ বাবে বৰপেটা সংহত শিশু উন্নয়ন প্ৰকল্প বিষয়া কাৰ্যালয়ৰ একাংশ কৰ্মচাৰীয়ে ৷ আনকি দৰমহা দিয়াৰ নামত এহেজাৰ টকাকৈ উৎকোচো লৈছিল ৷ লক্ষ্যণীয়ভাৱে অংগনবাড়ী সন্থাৰ বিষয়ববীয়াৰ জৰিয়তে দৰমহাৰ বাবদ প্ৰতিজনৰ পৰা এহেজাৰ আৰু প্ৰাপ্য ধন উলিয়াই দিয়াৰ নামত প্ৰতিটো অংগনবাড়ী কেন্দ্ৰৰ পৰা টকা আদায় কৰিছিল ৷
তথাপিও মাহেকীয়া দৰমহাৰ ধন লাভ কৰিব সক্ষম নহ'ল কৰ্মচাৰী সকল ৷ আনকি লাভ নকৰিলে প্ৰাপ্য ধন ৷ উৎকোচ আদায় দিয়াৰ পিচতো দৰমহাৰ ধন লাভ নকৰা ঘটনাকলৈ ক্ষোভিত হৈ পৰিছে বৰপেটাৰ এইসকল অংগনবাড়ী কৰ্মী ৷ শূন্য সহনশীলতাৰ কথা কোৱা ৰাজ্য চৰকাৰৰ সমাজ কল্যাণ বিভাগৰ একাংশ বিষয়া কৰ্মচাৰীয়ে মাহেকীয়া প্ৰাপ্য দৰমহাৰ ধনকেইটা মুকলি কৰি দিয়াৰ নামতো উৎকোচ লোৱাৰ কথাই যেন উদঙাই দিছে ৰাজ্যৰ প্ৰকৃত ছবি ৷ দৰমহাৰ নামতো উৎকোচৰ বেহা চলি থকা বৰপেটাৰ সমাজ কল্যাণ বিভাগৰ এই অনিয়মৰ সম্পৰ্কত কিবা ব্যৱস্থা ল'বনে বিভাগীয় মন্ত্ৰীয়ে ৷ বিভাগীয় মন্ত্ৰীৰ তৎপৰতাই সূচাব আছলতে দুৰ্নীতিৰ বিৰুদ্ধে কিমান শূণ্য়সহনশীল ৰাজ্যৰ সৰ্বানন্দ সোণোৱাল চৰকাৰ ৷
