বৰপেটা ১৩ আগষ্ট: গুৱাহাটী কেন্দ্ৰীয় কাৰাগাৰৰ ভিতৰচ’ৰাক লৈ পুনৰ সৰৱ হৈ উঠিছে বাঘবৰ সমষ্টিৰ বিধায়ক শ্বেৰমান আলী আহমেদ(MLA Sherman Ali Ahmed)৷ শনিবাৰে বৰপেটাত উপস্থিত হৈ বিধায়কগৰাকীয়ে পুনৰ কাৰাগাৰৰ অব্যৱস্থাৰ ওপৰত অভিযোগ উত্থাপন কৰি কয়, "মই যোৱা 2 অক্টোবৰৰ পৰা 7 ডিচেম্বৰলৈ কেন্দ্ৰীয় কাৰাগাৰত আছিলো ৷ সেই কাৰাবাসৰ সমখিনিত মই কাৰাবন্দীসকলৰ অবৰ্ণনীয় দুৰ্দশা, তেওঁলোকৰ মানৱ অধিকাৰ উলংঘনা হোৱা প্ৰত্যক্ষ কৰিছিলোঁ ৷ কাৰাবন্দীসকলৰ মৌলিক প্ৰয়োজনখিনিও পূৰণ কৰা হোৱা নাই ৷ আনকি তেওঁলোকে খোৱা পানীও পৰ্যাপ্ত পৰিমানৰ নাপায় ৷ সেই অসুবিধাবোৰ লৈ মই কাৰাগাৰৰ পৰা ওলাই আহি সংবাদমাধ্যমৰ আগত মই কিছু কথা কৈছিলো (MLA Sherman Ali Ahmed commented on Guwahati central jail)" ৷
লগতে বিধায়কগৰাকীয়ে কয়, "বিশেষকৈ কাৰাগাৰত এহেজাৰ বন্দী থকাৰ সুবিধাৰ স্বত্বেও তাত অতিৰিক্ত 2000 কাৰাবন্দী ৰখা হৈছে ৷ ইয়াৰ ফলত কাৰাবন্দীসকলে নিশা ভালকৈ শুবলৈও ঠাইৰ অভাৱ হয় ৷ বহুতো কাৰাবন্দীয়ে বহি বহি নিশাটো পাৰ কৰিব লাগে ৷ খোৱা পানী পুৱা এঘণ্টা আৰু ৰাতি এঘণ্টাৰ কাৰণে দিয়ে ৷ প্ৰস্ৰাৱগাৰৰ অৱস্থা অত্যন্ত বেয়া ৷ কাৰাবন্দীসকলক দিয়া খাদ্যও একেবাৰে নিম্নমানদণ্ডৰ ৷ কাৰাবন্দীসকলক ঘৰৰ লোকে লগ কৰিব পৰা ব্যৱস্থাটোও সুচল নহয়" ৷
উল্লেখ্য যে গুৱাহাটী কেন্দ্ৰীয় কাৰাগাৰত দুমাহ কটাই আহি কাৰাগাৰৰ সমস্যাৰ কথা সংবাদ মাধ্যমৰ আগত প্ৰকাশৰ পিছতে অসম মানৱাধিকাৰ আয়োগে(Assam Human Rights Commission) নিজাববীয়াকৈ গোচৰ ৰুজু কৰিছিল বিধায়কজনে ৷ ইতিমধ্যে মানৱ অধিকাৰ আয়োগৰ গোচৰটোৰ কেবাটাও শুনানিত তেওঁ নিজেই উপস্থিত থকাৰ লগতে সাক্ষী দিছিল বিধায়কগৰাকীয়ে ৷
আনকি বিধায়কগৰাকীয়ে কাৰাগাৰত চলি থকা ব্যৱস্থা সম্পৰ্কত ৰাজহুৱাকৈ প্ৰকাশ কৰাৰ পিছতে মুখ্যমন্ত্ৰীয়ে বাজেট বিতৰ্কৰ ভাষণত কাৰাগাৰ সংস্কাৰৰ কথা উল্লেখ কৰা বুলি মন্তব্য কৰে বিধায়কগৰাকীয়ে ৷ বিধানসভাৰ অভিযোগ কমিটিতো বিষয়টোক লৈ গোচৰ চলি আছে আৰু কমিচনাৰ চেক্ৰেটেৰী দিগন্ত বৰাৰ নেতৃত্বত তৃতীয় কোনো পক্ষৰ দ্বাৰা কাৰাগাৰসমুহ পৰিদৰ্শন কৰি প্ৰতিবেদন দাখিলৰ নিৰ্দেশ দিয়া বুলিও উল্লেখ কৰে বিধায়কগৰাকীয়ে ৷
আনহাতে গুৱাহাটী কেন্দ্ৰীয় কাৰাগাৰৰ অধীক্ষকগৰাকীৰ লগতে কাৰাগাৰ মহাপৰিদৰ্শকৰ কাম কাজক লৈ অসন্তুষ্ট বিধায়ক শ্বেৰমান আলী আহমেদ ৷ কাৰাগাৰৰ ভিতৰত ড্ৰাগছ ব্যৱসায়, কাৰাবন্দীক সাক্ষাতৰ নামত ধনদাবী, খাদ্য আদি অব্যৱস্থাৰ পৰিবৰ্তন আৰু সংস্কাৰৰ দাবী তোলে বিধায়কগৰাকীয়ে ৷
