বৰপেটা, ৬ জুনঃ ঘৰে ঘৰে পাচলি বিক্ৰী কৰি পৰিয়াল পোহপাল দিয়া কৰিম আলীৰ পুত্ৰ ইয়ামিন আলীয়ে ঢকুৱা হাইমাদ্ৰাছাৰ পৰা ৰাজ্যৰ ভিচৰতে প্ৰথম স্থান লাভ কৰিবলৈ সক্ষম হৈছে ৷ ছাত্ৰজনৰ এই সাফল্যক লৈ উৎফুল্লিত অঞ্চলটোৰ সকলো ৰাইজ ৷ এই সাফল্যৰ পিচতে বৰপেটাৰ অগপ বিধায়ক গুনীন্দ্ৰ নাথ দাস ছাত্ৰজনৰ গৃহত উপস্থিত হৈ তেওঁক শুভেচ্ছা জনায় ৷ অতি দৰিদ্ৰ পৰিয়ালৰ সন্তান ইয়ামিনৰ এই সাফল্যক লৈ বৰপেটাৰ অগপ বিধায়ক গৰাকীয়ে সন্তুষ্টি প্ৰকাশ কৰাৰ লগতে ঘৰখনৰ আৰ্থিক দুৰৱস্থাৰ প্ৰতি লক্ষ্য ৰাখি উচ্চতৰ মাধ্যমিকৰ পঢ়াৰ দায়িত্ব গ্ৰহণৰ কথা ঘোষণ কৰে ৷
লগতে পঢ়কঃ তিনি পৰীক্ষাৰ্থীয়ে স্থান লাভ কৰি গৌৰৱ কঢ়িয়াইছে গোলাঘাট জিলালৈ
ইয়াৰোপৰি ছাত্ৰজনক আজি ৫ হাজাৰ টকাও আগবঢ়ায় অগপ বিধায়কগৰাকীয়ে ৷ আনহাতে,ঢকুৱা হাইমাদ্ৰাছাৰ প্ৰধান শিক্ষয়ত্ৰী গৰাকীয়ে জনোৱা মতে, বিদ্যালয়খনত খালী হৈ আছে ১২ টাকৈ শিক্ষকৰ পদ ৷ ছাত্ৰজনৰ সাফল্যক লৈ গৰ্ব অনুভৱ কৰা প্ৰধান শিক্ষয়ত্ৰীগৰাকীয়ে জনোৱা মতে,ধাৰ কৰি অনা শিক্ষকেৰে চলিছিল ইংৰাজী বিষয়ৰ পাঠদান ৷ সেয়ে বিদ্যালয়ৰ আন্তঃগাঠনি উন্নত কৰাৰ লগতে খালীপদসমূহ পুৰণ কৰাৰ বাবে শিক্ষামন্ত্ৰী ডঃ হিমন্ত বিশ্ব শৰ্মাক আহ্বান জনায় প্ৰধান শিক্ষয়ত্ৰীগৰাকীয়ে ৷
