আগৰতলা : ত্ৰিপুৰাৰ বিভিন্ন স্থানত ইডিৰ বৃহৎ অভিযান । নিচাজাতীয় দ্ৰব্যৰ বিৰুদ্ধে ইডিয়ে অভিযান চলায় । অভিযানৰ অন্তত ইডিয়ে কয় যে ত্ৰিপুৰাৰ ৭টাকৈ স্থানত চলা এই অভিযানত যথেষ্ট পৰিমাণৰ গাঞ্জা, বিত্তীয় নথি-পত্ৰ আৰু অবৈধ সম্পত্তিৰ লগতে ইলেক্ট্ৰনিক সঁজুলি জব্দ কৰা হয় ।
প্ৰেছ বিবৃতিত ইডিয়ে কয় যে তেওঁলোকে ১০ জানুৱাৰীত ত্ৰিপুৰাৰ একাধিক স্থানত ধন আত্মসাৎ গোচৰত অনুসন্ধান চলাইছে । গাঞ্জাকে ধৰি বিভিন্ন প্ৰকাৰৰ নিচাজাতীয় দ্ৰব্যৰ আন্তঃৰাষ্ট্ৰীয় সৰবৰাহকাৰী চক্ৰৰ বিৰুদ্ধে এই অভিযান চলোৱা হৈছিল ।
বিবৃতিত কোৱা হৈছে, "ইডিয়ে এনডিপিএছ আইন, ১৯৮৫ৰ বিভিন্ন ধাৰাৰ অধীনত ত্ৰিপুৰা আৰক্ষীয়ে পঞ্জীয়ন কৰা একাধিক এজাহাৰৰ ভিত্তিত কামিনী দেববৰ্মা, বিশু ত্ৰিপুৰা, অপ ৰঞ্জন দাস আৰু আন কেইবাজনৰ বিৰুদ্ধে নিচাজাতীয় দ্ৰব্য সৰবৰাহ কৰাৰ অপৰাধৰ বাবে তিনিটা পৃথক গোচৰৰ তদন্ত আৰম্ভ কৰে ।"
- ইডিৰ ড্ৰাগছ বিৰোধী অভিযান
বিবৃতিটোত উল্লেখ কৰা হৈছে যে অভিযুক্ত লোকসকলে ত্ৰিপুৰা, অসম, বিহাৰ আৰু ভাৰতৰ অন্যান্য ৰাজ্যত ড্ৰাগছ সৰবৰাহৰ বাবে এক আন্তঃৰাজ্যিক নেটৱৰ্ক গঢ়ি তুলিছিল ।
ইডিয়ে বিবৃতিত উল্লেখ কৰিছে, "এই অভিযানটো ড্ৰাগছৰ বেহাৰ বিৰুদ্ধে যুঁজি দিয়া আৰু ড্ৰাগছ সৰবৰাহৰ দ্বাৰা অবৈধভাৱে সম্পত্তি বিচাৰি উলিওৱা আৰু জব্দ কৰাৰ বাবে ইডিৰ দ্বাৰা চলি থকা প্ৰচেষ্টাৰ অংশ আছিল । ইডিৰ অনুসন্ধানত প্ৰকাশ পাইছে যে ড্ৰাগছ সৰবৰাহৰ জৰিয়তে উপাৰ্জন কৰা ধনবোৰ হাৱালাৰ জৰিয়তে লাভ কৰি বেনামী একাউণ্টত জমা কৰা, পৰিয়ালৰ সদস্য আৰু আন লোকৰ নামত বিভিন্ন স্থাৱৰ বা অস্থাৱৰ সম্পত্তি ক্ৰয় কৰাত বিনিয়োগ কৰা হৈছিল ।"
অভিযানৰ সময়ত যথেষ্ট পৰিমাণৰ (প্ৰায় ৬৬ কিলোগ্ৰাম) গাঞ্জা আৰু লগতে অন্যান্য আপত্তিজনক নথি জব্দ কৰা হৈছে । যাৰ ভিতৰত আছে বিত্তীয় ৰেকৰ্ড, বেনামি সম্পত্তিৰ বিৱৰণ আৰু ইলেক্ট্ৰনিক সঁজুলি ।
