জনীয়া,15জুলাইঃ ৰাজ্যত উজনিৰ পৰা নামনিলৈ অব্যাহত আছে বানৰ তাণ্ডব ৷ নেৰানেপেৰা আৰু ধাৰাষাৰ বৰষুণৰ হৈ থকাৰ ফলত ৰাজ্যৰ নৈ-উপনৈ সমূহ উফন্দি উঠিছে যাৰফলত ৰাজ্যৰ বিভিন্ন প্ৰান্তত বানে সংহাৰী ৰূপধাৰণ কৰা দেখিবলৈ পোৱা গৈছে ৷ বৰপেটা জিলাৰ বিভিন্ন প্ৰান্তত বানে সংহাৰ চলোৱাৰ ফলত শোনাপুৰ, বালিকুৰি, কৈমাৰী, গোবিন্দপুৰ মিলন বজাৰকে ধৰি বহুকেইটা শিবিৰত থাকিবলগীয়া হৈছে বানাক্ৰান্ত সকল ৷ ইপিনে ৰূপসী ব্লক কংগ্ৰেছৰ এটা সজাঁতি দলে যন্ত্ৰচালিত নাৱৰে কলগাছিয়া আৰু বাঘবৰ ৰাজহ চক্ৰৰ অন্তৰ্গত বিভিন্ন বানাক্ৰান্ত অঞ্চল পৰিদৰ্শন কৰি পৰিস্থিতিৰ বুজ লয় মঙলবাৰে।
বানাক্ৰান্ত সকলে নিজৰ ঘৰ-বাৰী এৰি বিভিন্ন স্কুল আৰু আন-আন ওখ ঠাইত গৰু, ম'হ, ভেড়া, ছাগলীৰ সৈতে একেলগে থাকিবলগীয়া পৰিস্থিতিৰ সৃষ্টি হৈছে ৷ ইপিনে বানৰ কবলত শ শ হেক্টৰ কৃষি ভূমিৰ লগতে বানত উতি গৈছে পোহনীয়া জীৱ জন্তু ৷ ফলত বানাক্ৰান্ত লোক সকল ব্যাপক লোকচানৰ সন্মূখীন হ‘ব লগীয়া হৈছে ৷ এইক্ষেত্ৰত চৰকাৰ তথা বৰপেটা জিলা প্ৰশাসনক বিহিত ব্যৱস্থা গ্ৰহণ কৰাৰ লগতে বানাক্ৰান্ত সকলক ক্ষতিপূৰণ দিবলৈ চৰকাৰক আহ্বান জনায় বানাক্ৰান্ত দুৰ্ভোগীয়া লোক সকলে ।
উল্লেখযোগ্য যে, ৰাজ্যত কৰ‘ণা মহামাৰীৰ সমান্তৰলকৈ ভয়াবহ ৰূপ ধাৰণ কৰিছে বান পৰিস্থিতিয়ে ৷ সম্প্ৰতি ৰাজ্যত ব্ৰহ্মপুত্ৰ নদী কেইবাখনো জিলাত বিপদ সীমাৰ ওপৰে বৈ আছে ৷ তাৰ লগে লগে ৰাজ্যত নেৰানেপেৰা ধাৰাষাৰ বৰষুণ হৈ থকাৰ ফলত বিভিন্ন নদ-নদী উফন্দি উঠা পৰিলক্ষিত হৈছে ৷ বৰ্তমান ৰাজ্যখনৰ 28 খন জিলাই বানৰ কবলত আছে ৷ 92টা ৰাজহ চক্ৰৰ লগতে 3371খন গাঁও পানীৰ তলত আছে ৷ ইপিনে 1,28,495,22 হেক্টৰ ভূমি বানত প্লাবিত হৈ থকাৰ বিপৰীতে 32,94,127 গৰাকী বানৰ কবলত ক্ষতিগ্ৰস্ত হৈছে ৷ ইতিমধ্যে চৰকাৰে 517 টা আশ্ৰয় শিৱিৰ স্থাপন কৰি বানাক্ৰান্তক নিৰাপত্ত স্থানাত ৰখাৰ ব্যৱস্থা কৰিছে ৷ বানৰ সংহাৰৰ ফলত এই পৰ্যন্ত ৰাজ্যত 59 গৰাকী লোকে মৃত্যু মুখত পৰিছে ৷
লগতে পঢ়কঃ এএম পেলেচ হোটেলৰ সন্মুখত উদ্ধাৰ মানসিক বিকাৰগ্ৰস্তৰ মৃতদেহ
